Balqashta Metallýrg kúnine orai sala úzdikterin marapattaý rásimi ótti. Kásibi merekede úzdik metallýrgterge memlekettik jáne vedomstvolyq nagradalar tabystaldy, dep habarlaidy dalanews.kz.
Qaraǵandy oblysynyń ákimi Ermaǵanbet Bólekpaev metallýrgterdi kásibi merekesimen quttyqtap, olardyń eńbegi el ekonomikasynyń damýyna eleýli úles qosyp otyrǵanyn atap ótti.
«Prezident Qasym-Jomart Toqaev eńbek adamy qoǵamda erekshe qurmetke ie bolýy tiis ekenin birneshe ret aitty. Bul sóz eń aldymen metallýrgterge qatysty. Sizderdiń qajyrly eńbekterińizdiń arqasynda óńirdegi metallýrgiia salasy Qazaqstan ekonomikasynyń negizgi tirekteriniń biri bolyp otyr», – dedi oblys ákimi.
Onyń aitýynsha, 2025 jyly Qaraǵandy oblysynda ónerkásip óndirisiniń kólemi 5,3 trln teńgeden asyp, onyń 3,8 trln teńgesi óńdeý ónerkásibiniń úlesine tiesili bolǵan.
Saltanatty jiynda óńir basshysy metallýrgiianyń damýyna úles qosqan eńbek áýletterin de erekshe atap ótti. Solardyń biri – birneshe býyny osy salada eńbek etip kele jatqan Aqbergenovter áýleti.
Shara barysynda úzdik qyzmetkerlerge «Eńbek Dańqy», «Qurmetti metallýrg» tósbelgileri men «Eńbek ardageri» medaldary tapsyryldy.
«Qazaqmys korporatsiiasy» JShS basqarma tóraǵasy Rýslan Óskenálidiń aitýynsha, biylǵy alǵashqy alty aida Balqash mys balqytý zaýyty 96 myń tonnadan astam katodty mys óndirgen.
Ol kásiporynda óndiristik infraqurylymdy jańǵyrtý jumystary jalǵasyp jatqanyn aitty. Qazirgi tańda balqytý agregattaryna kúrdeli jóndeý júrgizilip, ǵimarattar jańartylýda. Sonymen qatar kásiporynǵa jyl sońyna deiin jalpy quny 166 mln teńgeden asatyn eki jańa jedel járdem kóligi satyp alynady. Al «Gigiena» korporativtik baǵdarlamasy aiasynda áleýmettik-turmystyq baǵyttaǵy 24 nysandy jańǵyrtýǵa 754 mln teńge bólingen.
Óz kezeginde «Qazaqmys korporatsiiasy» JShS baqylaý keńesiniń tóraǵasy Nurmuhambet Ábdibekov kompaniia óndiristi jańǵyrtýmen qatar óńirlerdiń áleýmettik damýyna da investitsiia salyp jatqanyn aitty.
Onyń málimetinshe, kompaniianyń áleýmettik jáne infraqurylymdyq jobalarynyń jalpy quny 45 mlrd teńgeni quraidy. Balqashta aldaǵy jyldary jańa balabaqsha men sporttyq-týristik baza salý josparlanǵan.
Metallýrg kúnine arnalǵan merekelik sharalar Balqashta mádeni-oiyn-saýyq baǵdarlamalarymen, sporttyq jarystarmen jáne kontsertpen jalǵasady.
