Almaty oblysynda Balqash kólinen 260 keliden astam balyqty zańsyz aýlaǵan brakonerlerge qatysty sot úkimi shyqty, dep habarlaidy dalanews.kz.
Balqash aýdandyq sotynyń málimetinshe, sottalýshy T. kináli dep tanylyp, oǵan úsh jyl merzimge bas bostandyǵyn shekteý jazasy taǵaiyndaldy. Sondai-aq ol úsh jyl boiy balyq aýlaý qyzmetimen ainalysý quqyǵynan aiyrylyp, probatsiialyq baqylaýǵa alyndy jáne jyl saiyn 100 saǵat májbúrli eńbekke tartylatyn boldy. Memleketke keltirilgen shyǵynnyń qalǵan bóligi tolyq óndirildi.
Is boiynsha ekinshi aiyptalýshy P. quqyq buzýshylyq jasaǵan kezde psihikalyq jaǵdaiyna bailanysty esi durys emes dep tanylǵan. Osyǵan bailanysty ol Qylmystyq kodekstiń 16 jáne 75-baptary negizinde qylmystyq jaýaptylyqtan bosatyldy. Sot oǵan turǵylyqty jeri boiynsha dárigerdiń ambýlatoriialyq baqylaýy men em qabyldaýdy taǵaiyndady.
Sot dereginshe, qylmystyq is Qylmystyq kodekstiń 335-baby 3-bóligi 4 jáne 5-tarmaqtary boiynsha qaralǵan.
2025 jylǵy 30 qazanda «Brakoner» jedel-profilaktikalyq is-sharasy barysynda politsiia men balyq inspektsiiasynyń qyzmetkerleri Balqash kólinde eki azamatty ustaǵan.
Olar «Yamaha-40» qozǵaltqyshy ornatylǵan qaiyq pen uzyndyǵy 500 metr sintetikalyq aýlardy paidalanyp, 261 keli balyqty zańsyz aýlaǵan. Nátijesinde memleketke 1 277 506 teńge kóleminde zalal keltirilgen.
Sot jaza taǵaiyndaý kezinde aiyptalýshynyń kinásin tolyq moiyndaýyn, shyn ókinýin jáne memleketke keltirilgen 890 myń teńge shyǵyndy erikti túrde óteýin jeńildetetin mán-jai retinde eskerdi.
Úkim zańdy kúshine endi.
