Atyraý oblysynda týystaryn asa qatygezdikpen óltirdi dep aiyptalǵan Sultan Sársemálievke qatysty sot protsesi jalǵasyp jatyr. Is dáleldemelerdi zertteý kezeńine ótip, sot otyrysynda tergeý barysynda túsirilgen beinematerialdar kórsetildi, dep habarlaidy dalanews.kz.
Sotta 2025 jyldyń jeltoqsanynda joǵalyp ketken erli-zaiypty Maqsot Qarabalin men Násip Óteshqalievanyń deneleri tabylǵan sátke qatysty kadrlar usynyldy. Tergeý málimetinshe, olardyń máiitteri jeke úidiń aýlasyndaǵy qora ishinde shamamen 1,3 metr tereńdikke kómilgen. Jerlengen orynnyń ústi linoleýmmen jabylǵany aityldy.
Beinematerialda tergeýshiler aldymen er adamnyń, keiin onyń astynan áieliniń denesin shyǵarǵany kórsetilgen. Buǵan deiin politsiia, Ulttyq ulan qyzmetkerleri men arnaiy tehnika jumyldyrylǵan izdeý jumystary júrgizilgenimen, nátije bolmaǵan. Tergeý dereginshe, jasyryn kómilgen oryn 2026 jylǵy 9 naýryzda tergeý eksperimenti kezinde anyqtalǵan.
Sot zalynda kórsetilgen bul kadrlar marqumdardyń týystaryna aýyr áser etti. Al aiyptalýshy Sultan Sársemáliev beinematerialdardy únsiz qarap otyrǵan.
Sonymen qatar otyrysta aiyptalýshynyń Atyraýdaǵy "Dina" bazaryndaǵy lombardqa barǵan sáti de kórsetildi. Baqylaý kameralaryndaǵy kadrlarda onyń zergerlik buiymdar salynǵan qyzyl qorapshany ótkizip, keiin aqsha alyp shyqqany baiqalady. Tergeý tarapy bul áshekeiler qaza tapqan otbasynyń úiinen alynǵan bolýy múmkin dep esepteidi.
Budan bólek, sotta Sársemáliev pen onyń jubaiy Aqbaian Muqanǵalievanyń Qazaqstannan ketken baǵyty týraly da aityldy. Tergeý málimetine sáikes, olar 2025 jylǵy 9 jeltoqsanda "Qaplanbek" ótkizý beketi arqyly Ózbekstanǵa ótken. Keiin Tashkentten Kýala-Lýmpýr arqyly Indoneziianyń Bali aralyna barǵan.
Erli-zaiypty birneshe ai boiy Indoneziiada bolǵan. Alaida 2026 jylǵy 24 aqpanda jergilikti kóshi-qon qyzmeti olardy vizalyq rejimdi buzǵany úshin ustaǵan. Keiin ekeýi Qazaqstanǵa deportatsiialanyp, quqyq qorǵaý organdaryna tapsyrylǵan.
Qazir sot protsesi jalǵasyp jatyr. Istiń tolyq mán-jaiy sot barysynda anyqtalmaq.
