اتىراۋ وبلىسىندا تۋىستارىن اسا قاتىگەزدٸكپەن ٶلتٸردٸ دەپ ايىپتالعان سۇلتان سەرسەمەليەۆكە قاتىستى سوت پروتسەسٸ جالعاسىپ جاتىر. ٸس دەلەلدەمەلەردٸ زەرتتەۋ كەزەڭٸنە ٶتٸپ, سوت وتىرىسىندا تەرگەۋ بارىسىندا تٷسٸرٸلگەن بەينەماتەريالدار كٶرسەتٸلدٸ, دەپ حابارلايدى dalanews.kz.
سوتتا 2025 جىلدىڭ جەلتوقسانىندا جوعالىپ كەتكەن ەرلٸ-زايىپتى ماقسوت قارابالين مەن نەسٸپ ٶتەشقاليەۆانىڭ دەنەلەرٸ تابىلعان سەتكە قاتىستى كادرلار ۇسىنىلدى. تەرگەۋ مەلٸمەتٸنشە, ولاردىڭ مەيٸتتەرٸ جەكە ٷيدٸڭ اۋلاسىنداعى قورا ٸشٸندە شامامەن 1,3 مەتر تەرەڭدٸككە كٶمٸلگەن. جەرلەنگەن ورىننىڭ ٷستٸ لينولەۋممەن جابىلعانى ايتىلدى.
بەينەماتەريالدا تەرگەۋشٸلەر الدىمەن ەر ادامنىڭ, كەيٸن ونىڭ استىنان ەيەلٸنٸڭ دەنەسٸن شىعارعانى كٶرسەتٸلگەن. بۇعان دەيٸن پوليتسييا, ۇلتتىق ۇلان قىزمەتكەرلەرٸ مەن ارنايى تەحنيكا جۇمىلدىرىلعان ٸزدەۋ جۇمىستارى جٷرگٸزٸلگەنٸمەن, نەتيجە بولماعان. تەرگەۋ دەرەگٸنشە, جاسىرىن كٶمٸلگەن ورىن 2026 جىلعى 9 ناۋرىزدا تەرگەۋ ەكسپەريمەنتٸ كەزٸندە انىقتالعان.
سوت زالىندا كٶرسەتٸلگەن بۇل كادرلار مارقۇمداردىڭ تۋىستارىنا اۋىر ەسەر ەتتٸ. ال ايىپتالۋشى سۇلتان سەرسەمەليەۆ بەينەماتەريالداردى ٷنسٸز قاراپ وتىرعان.
سونىمەن قاتار وتىرىستا ايىپتالۋشىنىڭ اتىراۋداعى "دينا" بازارىنداعى لومباردقا بارعان سەتٸ دە كٶرسەتٸلدٸ. باقىلاۋ كامەرالارىنداعى كادرلاردا ونىڭ زەرگەرلٸك بۇيىمدار سالىنعان قىزىل قوراپشانى ٶتكٸزٸپ, كەيٸن اقشا الىپ شىققانى بايقالادى. تەرگەۋ تاراپى بۇل ەشەكەيلەر قازا تاپقان وتباسىنىڭ ٷيٸنەن الىنعان بولۋى مٷمكٸن دەپ ەسەپتەيدٸ.
بۇدان بٶلەك, سوتتا سەرسەمەليەۆ پەن ونىڭ جۇبايى اقبايان مۇقانعاليەۆانىڭ قازاقستاننان كەتكەن باعىتى تۋرالى دا ايتىلدى. تەرگەۋ مەلٸمەتٸنە سەيكەس, ولار 2025 جىلعى 9 جەلتوقساندا "قاپلانبەك" ٶتكٸزۋ بەكەتٸ ارقىلى ٶزبەكستانعا ٶتكەن. كەيٸن تاشكەنتتەن كۋالا-لۋمپۋر ارقىلى يندونەزييانىڭ بالي ارالىنا بارعان.
ەرلٸ-زايىپتى بٸرنەشە اي بويى يندونەزييادا بولعان. الايدا 2026 جىلعى 24 اقپاندا جەرگٸلٸكتٸ كٶشٸ-قون قىزمەتٸ ولاردى ۆيزالىق رەجيمدٸ بۇزعانى ٷشٸن ۇستاعان. كەيٸن ەكەۋٸ قازاقستانعا دەپورتاتسييالانىپ, قۇقىق قورعاۋ ورگاندارىنا تاپسىرىلعان.
قازٸر سوت پروتسەسٸ جالعاسىپ جاتىر. ٸستٸڭ تولىق مەن-جايى سوت بارىسىندا انىقتالماق.
