Ádilet ministri Erlan Sársembaev týǵan balalaryn asyraýdan qashatyn ákelerdi ákimshilik ne qylmystyq jaýapqa tartý azdyq etetinin alǵa tartyp, memlekettik organdar otbasy institýtyn nyǵaitý boiynsha keshendi jumys júrgizýi kerek ekenin málimdedi. Bul týraly ol Májiliste ótken úkimet saǵatynda aitty, dep habarlaidy Dalanews.kz.
“Aliment – kámeletke tolmaǵan balalardyń quqyqtaryn qamtamasyz etetin áleýmettik mańyzy joǵary tólem", – deidi ministr.
Ministrdiń aitýynsha, osy jyldyń basynda aliment óndirýge qatysty 283 myń qujat bolǵan. Onyń 12 835 nemese 4% paiyzy problemaly jáne olar boiynsha aliment tólenbeidi. Olarǵa qatysty atqarýshylyq qujattyń oryndalýyn qamtamasyz etetin májbúrlep oryndatý sharalary qoldanylady.
"Aliment óndirip alý týraly atqarýshylyq qujattardy oryndaý kezindegi negizgi problemalar turaqty tabystyń jáne múliktiń bolmaýy, al keibir jaǵdailarda tabystardy qasaqana jasyrý bolyp qala beredi. Jumyssyz boryshkerlerdi jumysqa ornalastyrý boiynsha júieli jumystar júrgizilýde”, – dep málimdedi ol.
Sondai-aq ol jumyssyz boryshkerlerdi jumysqa ornalastyrý máselesi de jolǵa qoiylǵanyn aitty. Máselen, 2020 jyly 1 559 adam eńbekpen qamtylsa, 2024 jyly bul kórsetkish 6 232-ge jetken.
“Biyl aliment tólemegeni úshin 4 642 boryshker ákimshilik jaýapkershilikke tartyldy. Sonymen qatar Qylmystyq kodekstiń 139-baby boiynsha 745 is tirkelip, 461-i sotqa joldandy. Nátijesinde 391 boryshker sottalǵan”, – dedi ministr.
Sársembaev bul máseleniń otbasylyq qundylyqtardyń álsireýinen týyndap otyrǵanyn atap ótti. Onyń aitýynsha, 2023 jyly elimizde 61 080 ajyrasý tirkelgen. Bul – tirkelgen neke sanynyń (124 774) jartysyna jýyǵy.
“Balalaryn asyraýǵa niet bildirmeý men alimentten qashý – otbasylyq-neke institýtynyń daǵdarysqa ushyraýynyń saldary. Sondyqtan otbasy institýtyn nyǵaityp, balalardyń quqyqtaryn qorǵaý úshin keshendi sharalar qajet. Aliment tólemderin óndirý ministrliktiń erekshe baqylaýynda", – dedi Erlan Sársembaev.
