Jansaqtaý bóliminde jatqan 16 jastaǵy jetkinshektiń jaǵdaiy ońalyp, jalpy palataǵa aýystyrylǵan. Al arnaiy qurylǵan shtab aýylda túsindirý jumysyna qyzý kirisken.
Kúlshash Serikbaeva eki kúnnen beri aýrýhanyń aldyn toryp júr. Uly Nurboldyń basyna ota jasalǵanda ózin qoiarǵa jer tappaǵan. Bes balanyń kenjesi mundai tóbelesterge osyǵan deiin qatyspaǵanyn aitty. Balany osyndai kúige túskenshe, tepkilegenderdi keshirýge ázir daiyn emes ekenin de
– Balam mundai tóbeleske qatysyp kórgen emes. Eki jaq bir-birimizben tatýlastyq. Keshirim surap keldi. Olarǵa ókpem joq. Biraq balam aiaǵynan tik turyp, qalpyna kelgenshe men eshkimge keshirim bermeimin. Balam aiaǵynan tursyn. Odan keiingi emi qalai bolady? Sony kóremin. Basyna ota jasalynyp, plastmass salyndy. Em alyp shyqqannan keiin jaǵdaiyn baqylaýym kerek, – dedi jábirlenýshiniń anasy.
10-synyp oqýshysy Nurboldyń beti búgin beri qarady. Aq halattylar soqqydan uiyp qalǵan qandy basyn tilip shyǵarǵan. Jansaqtaý bóliminen jalpy palataǵa aýystyrylýy jaqyndarynyń kóńiline medeý boldy. Dárigerler jaǵdaiy qalypty, jazylýǵa bet burǵanyn alǵa tartýda.
– Búgin jalpy tekseris bolyp, jaǵdaiynyń bir qalypqa kelgenin eskerdik. Jaraqatty emdeitin bólimge aýystyryldy. Jaǵdaiy bir qalypty. Esin anyq biledi. Tamaqty ózi iship jatyr. Áńgimelesedi. Jalpy mundai naýqas keminde eki apta jatý kerek. Qansha degenmen ota boldy. Miy shaiqaldy, soǵylý belgileri bar. Sondan keiin úiine shyǵarylady. Úiine shyqqan soń qalpyna keltirý emi kezeń-kezeńimen júzege asatyn bolady, – deidi Panfilov aýdany aýrýhanasynyń bas dárigeriniń orynbasary Erbolat Begembekov.
Penjimdegi oqýshylar tóbelesinen soń keshe qurylǵan shtabtyń jumysy búgin jandandy. Aýyldaǵy myńnan astam bala oqityn jalǵyz mektepte túsindirý jumysy qyzý júrip jatyr. Muǵalimder tártipke qatysty áńgimeni sabaqtan tys ýaqytta da júrgizedi.
– Qazir mektep oqýshylary qalypty jaǵdaida sabaq oqyp jatyr. Synyp jetekshileri mektep psihologtar birlesip ár synypta túsindirý jumystaryn júrgizýde. Sabaqtan tys ýaqytta keste qurylǵan. Kestemen oqýshylar shaqyrylyp, qosymsha jumystar júrgizip jatyr. Qazir oqýshylar arasynda ondai kikiljiń joq. Barlyǵy bir-birinen keshirim surady. Balalardyń qarym-qatynasy jaqsy, – dedi A.Rozybakiev atyndaǵy mektep direktorynyń orynbasary Názira Qalybaeva.
Eki kún buryn oqýshylar arasyndaǵy tóbelesten soń, jappai teketires aýyl jastary arasynda jalǵasqan bolatyn. Synǵan tereze, búlingen kólikter bar. Osy oqiǵaǵa qatysy barlardyń bári qazir izdestirilip jatyr. Tergeý amaldary bastalyp ketken. Al aýyldaǵy tártipti politsiia baqylaýda áli ustap otyr.
