QR-kodty skanerleý arqyly oqýshylar «Bala Qorgau» saıtyna ótip, óz suraqtaryn qoıa alady. Oqýshylar men ata-analar da jasyryn túrde kómek surap, bilim berý uıymdaryndaǵy zańsyz áreketter týraly habarlaı alady.
Ótinish berýshilerdiń anonım bolyp qalatynyna kepildik beriledi.
Búgingi kúnge deıin Nur-Sultan men Almatynyń birneshe mektebinde QR-taqtaıshalar ornatyldy. Aldaǵy ýaqytta olar basqa da bilim berý uıymdarynda ornatylady. Qazirdiń ózinde 100-den astam ótinish tústi, olar negizinen balalar men ata-analar arasyndaǵy qarym-qatynas máselelerine qatysty.
– «Bala Qorgau» saıty oqýshylar árdaıym qajetti qoldaý men kómek surap, ózderin qaýipsiz sezinýleri úshin jasalǵan. Ártúrli jaǵdaılarǵa tap bolǵan balalar kóbinese ózin qalaı ustaý jáne kimnen kómek suraý keregin bilmeıdi. Olar ózderine nemese qurdastaryna qatysty býllıng faktilerin kimge habarlaý keregin bilmeıdi. Endi oqýshylar QR-kodty skanerlep, bizben baılanysa alady, sóıtip olarǵa qajetti konsýltasıa, psıhologıalyq kómek kórsetiledi. Veb-saıt oqýshylardy tolǵandyratyn ózekti máselelerdi, sondaı-aq balalar quqyqtaryn buzý faktilerin tez arada anyqtaýǵa kómektesedi. Bul resýrs oqýshylardyń jáne olardyń ata-analarynyń quqyqtyq saýattylyǵyn arttyrýǵa septigin tıgizedi, – dedi QR BǴM Balalardyń quqyqtaryn qorǵaý komıteti tóraǵasynyń orynbasary Elına Paýlı.
Saıtta oqýshylar men ata-analar belgili bir jaǵdaıǵa tap bolǵanda ózin qalaı ustaý keregi týraly keńester taba alady. Mysaly, jańa dostar tabýǵa, jaman ortaǵa tap bolmaýǵa qatysty aqparattar bar. Balalar suraqty ashyq ta, jasyryn da qoıa alady. Ol úshin veb-saıtta ótinish qaldyrý kerek, keıin keńesshiler keri baılanys jasap, balalar men ata-analardy mazalaıtyn suraqtarǵa jaýap beredi.
