QR-كودتى سكانەرلەۋ ارقىلى وقۋشىلار «Bala Qorgau» سايتىنا ءوتىپ، ءوز سۇراقتارىن قويا الادى. وقۋشىلار مەن اتا-انالار دا جاسىرىن تۇردە كومەك سۇراپ، ءبىلىم بەرۋ ۇيىمدارىنداعى زاڭسىز ارەكەتتەر تۋرالى حابارلاي الادى.
ءوتىنىش بەرۋشىلەردىڭ انونيم بولىپ قالاتىنىنا كەپىلدىك بەرىلەدى.
بۇگىنگى كۇنگە دەيىن نۇر-سۇلتان مەن الماتىنىڭ بىرنەشە مەكتەبىندە QR-تاقتايشالار ورناتىلدى. الداعى ۋاقىتتا ولار باسقا دا ءبىلىم بەرۋ ۇيىمدارىندا ورناتىلادى. ءقازىردىڭ وزىندە 100-دەن استام ءوتىنىش ءتۇستى، ولار نەگىزىنەن بالالار مەن اتا-انالار اراسىنداعى قارىم-قاتىناس ماسەلەلەرىنە قاتىستى.
– «Bala Qorgau» سايتى وقۋشىلار ءاردايىم قاجەتتى قولداۋ مەن كومەك سۇراپ، وزدەرىن ءقاۋىپسىز سەزىنۋلەرى ءۇشىن جاسالعان. ءارتۇرلى جاعدايلارعا تاپ بولعان بالالار كوبىنەسە ءوزىن قالاي ۇستاۋ جانە كىمنەن كومەك سۇراۋ كەرەگىن بىلمەيدى. ولار وزدەرىنە نەمەسە قۇرداستارىنا قاتىستى بۋللينگ فاكتىلەرىن كىمگە حابارلاۋ كەرەگىن بىلمەيدى. ەندى وقۋشىلار QR-كودتى سكانەرلەپ، بىزبەن بايلانىسا الادى، ءسويتىپ ولارعا قاجەتتى كونسۋلتاسيا، پسيحولوگيالىق كومەك كورسەتىلەدى. ۆەب-سايت وقۋشىلاردى تولعاندىراتىن وزەكتى ماسەلەلەردى، سونداي-اق بالالار قۇقىقتارىن بۇزۋ فاكتىلەرىن تەز ارادا انىقتاۋعا كومەكتەسەدى. بۇل رەسۋرس وقۋشىلاردىڭ جانە ولاردىڭ اتا-انالارىنىڭ قۇقىقتىق ساۋاتتىلىعىن ارتتىرۋعا سەپتىگىن تيگىزەدى، – دەدى ق ر بعم بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى ەلينا پاۋلي.
سايتتا وقۋشىلار مەن اتا-انالار بەلگىلى ءبىر جاعدايعا تاپ بولعاندا ءوزىن قالاي ۇستاۋ كەرەگى تۋرالى كەڭەستەر تابا الادى. مىسالى، جاڭا دوستار تابۋعا، جامان ورتاعا تاپ بولماۋعا قاتىستى اقپاراتتار بار. بالالار سۇراقتى اشىق تا، جاسىرىن دا قويا الادى. ول ءۇشىن ۆەب-سايتتا ءوتىنىش قالدىرۋ كەرەك، كەيىن كەڭەسشىلەر كەرى بايلانىس جاساپ، بالالار مەن اتا-انالاردى مازالايتىن سۇراقتارعا جاۋاپ بەرەدى.
