Qazaqstanda balalar mekemelerindegi sanitariialyq qaýipsizdik máselesi jyl saiyn qaitalanyp keledi, dep habarlaidy Dalanews.kz.
Ártúrli óńirlerde balabaqshalar men mektepterde jappai ýlaný, infektsiialyq aýrýlardyń taralýy, ashana men turmystyq bólmelerdegi sanitarlyq talaptardyń saqtalmaýy týraly aqparat jii shyǵady. Soǵan qaramastan, uzaq ýaqyt boiy bul saladaǵy memlekettik baqylaý álsiz bolyp keldi.
Balalar qaýipsizdigi nege tolyq qamtamasyz etilmedi degen suraq QR Prezidenti janyndaǵy Ortalyq kommýnikatsiialar qyzmetinde ótken «Balalar múddesin qorǵaý: balalar mekemelerin sanepidqadaǵalaýdyń erekshe tártibin engizý» taqyrybyndaǵy dóńgelek ústelde kóterildi.
Is-shara barysynda DalaNews tilshisi sanepidqadaǵalaý júiesiniń álsireý sebebine qatysty tikelei suraq qoidy.
Balalar mekemelerinde ýlaný, infektsiia taralýy, sanitarlyq zańbuzýshylyqtar jyl saiyn qaitalanyp keledi. Demek, qazirgi sanepidqadaǵalaý júiesi balalardy naqty qorǵai almady. Osy olqylyq úshin qai organ jáne qai laýazymdy tulǵa jaýapty ekenin ashyq aita alasyz ba?
Bul suraqqa jaýap bergen QR Densaýlyq saqtaý ministrligi Sanitariialyq-epidemiologiialyq baqylaý komiteti tóraǵasynyń orynbasary Raqymjanova Maral Tileýlesqyzy memlekettik baqylaýdyń álsireýin 2013 jyly qabyldanǵan saiasi sheshimdermen bailanystyrdy.
«2013 jyly Úkimetpen memlekettik baqylaýdy deregýliatsiialaý týraly, barlyq memlekettik organdardaǵy dýbliajdy alyp tastaý jáne tekserýlerdi qysqartý týraly saiasi sheshim qabyldandy. Osyǵan bailanysty Kásipkerlik kodekske barlyq memlekettik organdardyń tekserýin edáýir shekteitin normalar engizildi.
Men óz baiandamamda aitqandai, osy tájiribe sanepidqyzmet organdarynyń memlekettik baqylaýdy qamtamasyz etýine keri áserin tigizdi. Osyny eskere otyryp, biz depýtattarmen birlesip Úkimetke jańa túzetýler paketin usyndyq.
Bul túzetýler, birinshiden, erekshe tártip aiasynda biz búgingi kúni tekserý paraqtarymen ózimizdi shektemeimiz. Biz qoldanystaǵy sanitariialyq qaǵidalardyń barlyq normasyn shekteýsiz tekseretin bolamyz.
Ekinshiden, siz aityp otyrǵandai, biz uzaq ýaqyt boiy shara qabyldamadyq degen pikir bar. Biraq sol kezeńde Úkimet bizneske óz aiaǵynan turyp ketýine múmkindik berdi.
Qazirgi tańda memleket túsinip otyr: balalar úshin qaýipsiz jaǵdaidy qamtamasyz etý qajet. Sondyqtan erekshe tártip eń aldymen memlekettik kásiporyndarǵa engiziledi. Memleket balalar úshin qaýipsiz jaǵdaidy qamtamasyz etýi tiis. Sonymen qatar memlekettik biýdjetten qarajat alyp, qyzmet kórsetetin biznes sýbektileri de osy tártipke kiredi. Osyǵan bailanysty erekshe tártipti engizý qazir de kesh emes dep esepteimin».
Jańa tártip elitalyq jekemenshik balabaqshalar men adam sany kóp memlekettik mekemelerge birdei qoldanyla ma, álde talaptar qaitadan ártúrli bola ma?
«Qazirgi tańda bizde elitalyq jáne elitalyq emes degen bólinis joq. Aiyrmashylyq tek mekemeniń memlekettik biýdjetten qarjylandyrylýyna nemese qarjylandyrylmaýyna bailanysty.Eger nysan memlekettik biýdjetten qarjylandyrylmasa, baqylaý qoldanystaǵy Kásipkerlik kodekske sáikes júrgiziledi. Al erekshe tártipke kiretin nysandar úshin talaptar biryńǵai bolady», - dedi Maral Tileýlesqyzy.
Osylaisha, bilik ókilderi balalar mekemelerindegi sanitariialyq qaýipsizdiktiń álsireýin deregýliatsiia saiasatynyń saldarymen túsindirip otyr. Memlekettik baqylaýdyń qysqarýy bizneske qolaily jaǵdai jasaǵanymen, onyń saldary balalar mekemelerindegi qaýipsizdik deńgeiine áser etkenin resmi túrde moiyndady.
Jańa «erekshe tártip» sol olqylyqtardy túzetýge baǵyttalǵan qadam retinde usynylǵanymen, baqylaý eń aldymen memlekettik jáne biýdjetten qarjylandyrylatyn mekemelerge ǵana kúsheitiledi. Al jekemenshik, biýdjetten tys balalar mekemeleri burynǵy shekteýli tártip aiasynda qala beredi.
Balalar qaýipsizdigine qatysty bul sheshimderdiń naqty nátijesin endi tájiribe kórsetedi.
