Balalar meditsinasyna bólinetin qarjy kólemi 585 mlrd teńgege deiin ósti. Bul týraly Úkimet basshysynyń baspasóz qyzmeti málim etti, dep habarlaidy dalanews.kz.
Resmi málimetke sáikes, jyl saiyn týa bitken damý aqaýy bar shamamen 1,5 myń nárestege jáne júrek aqaýy anyqtalǵan 2 myńǵa jýyq balaǵa ota jasalady. Sondai-aq operatsiiadan keiingi nárestelerdiń ómir súrý kórsetkishi 88%-dan 93%-ǵa deiin artqan.
Sońǵy jyldary balalarǵa kórsetiletin meditsinalyq kómekti qarjylandyrý kólemi eki eseden astam ulǵaiyp, 585 mlrd teńgege jetken. Budan bólek, tegin dári-dármekpen qamtylatyn azamattar sany 1,9 millionnan 3,4 million adamǵa deiin kóbeigen.
Táýelsizdik jyldarynan beri ana ólimi 6 ese azaisa, náreste ólimi 7,5 ese tómendegen.
Qazirgi ýaqytta Qazaqstanda balalarǵa meditsinalyq kómek kórsetýdiń kópdeńgeili júiesi jumys isteidi. Sonymen qatar, elde 81 meditsinalyq ońaltý ortalyǵynyń jelisi damyp keledi. Budan bólek, 273 qalalyq jáne 152 aýyldyq áielder konsýltatsiiasy, sondai-aq oblystyq perinataldyq ortalyqtar janyndaǵy 24 konsýltatsiia qyzmet kórsetedi.
