Qazaqstanda jazǵy maýsym qarsańynda balalar lagerlerine baqylaý kúsheitilip, tekserister jańa formatta ótedi, dep habarlaidy Dala News QR Densaýlyq saqtaý ministrliginiń baspasóz qyzmetine silteme jasap.
Ministrlik sanitarlyq-epidemiologiialyq jaǵdaidy baqylaýdy kúsheitip, endi tekseristerdiń bir bóligi aldyn ala eskertýsiz júrgiziletinin málimdedi. Bul lagerlerdiń naqty jaǵdaiyn kórýge jáne formaldy daiyndyqty boldyrmaýǵa baǵyttalǵan.
Jańa talaptarǵa sáikes, lager aýmaǵy qorshalǵan bolýy tiis. Úzdiksiz sý, káriz júiesi, jaryqtandyrý jáne jeldetý qamtamasyz etilýi qajet. Barlyq ǵimarattarda kúndelikti tazalyq jumystary júrgizilip, ruqsat etilgen dezinfektsiia quraldary qoldanylýy kerek.
Balalar úshin kúnine bes ret tamaqtaný jáne mindetti meditsinalyq qyzmet qarastyrylýy tiis.
Sý aidyndary bar oryndarda sý men topyraqtan synamalar alynyp, zerthanalyq tekserister júrgiziledi. Jaz boiy sý sapasyna turaqty monitoring jasalady.
2026 jyldyń ekinshi jartysynda memlekettik biýdjet esebinen qarjylandyrylatyn barlyq balalar lagerleri erekshe memlekettik baqylaý aiasynda tekseriledi.
Sonymen qatar alǵash ret josparly tekseristerdiń naqty tizimi bekitiledi. Bul tizimder 10 mamyrǵa deiin sanitarlyq-epidemiologiialyq baqylaý komitetiniń aýmaqtyq bólimsheleriniń saittarynda jariialanady.
Jańa júie aiasynda tek josparǵa engen nysandar ǵana emes, odan tys lagerler de tekseriledi.
Ministrlik lager ielerine nysandardy aldyn ala daiyndaýdy, sanitarlyq-epidemiologiialyq qorytyndy alýdy, qyzmetkerlerge qoiylatyn talaptardy saqtaýdy jáne balalar sanyn belgilengen limitten asyrmaýdy eskertti.
Ata-analarǵa tek resmi tizimdegi lagerlerdi tańdaýǵa, balanyń densaýlyǵyna nazar aýdarýǵa jáne meditsinalyq erekshelikteri týraly aldyn ala habarlaýǵa keńes berildi.
Qandai da bir zańbuzýshylyqtar anyqtalǵan jaǵdaida azamattar sanitarlyq-epidemiologiialyq baqylaý organdaryna júgine alady.
Ministrlik balalardyń jazǵy demalysy kezindegi qaýipsizdigi erekshe baqylaýda ekenin atap ótti.
Jergilikti atqarýshy organdardyń málimetinshe, biyl elde 199 lager jumys isteidi. Onyń 20-sy jyl boiy, al 179-y maýsymdyq.
