قازاقستاندا جازعى ماۋسىم قارساڭىندا بالالار لاگەرلەرىنە باقىلاۋ كۇشەيتىلىپ، تەكسەرىستەر جاڭا فورماتتا وتەدى، دەپ حابارلايدى Dala News ق ر دەنساۋلىق ساقتاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
مينيسترلىك سانيتارلىق-ەپيدەميولوگيالىق جاعدايدى باقىلاۋدى كۇشەيتىپ، ەندى تەكسەرىستەردىڭ ءبىر بولىگى الدىن الا ەسكەرتۋسىز جۇرگىزىلەتىنىن مالىمدەدى. بۇل لاگەرلەردىڭ ناقتى جاعدايىن كورۋگە جانە فورمالدى دايىندىقتى بولدىرماۋعا باعىتتالعان.
جاڭا تالاپتارعا سايكەس، لاگەر اۋماعى قورشالعان بولۋى ءتيىس. ۇزدىكسىز سۋ، كارىز جۇيەسى، جارىقتاندىرۋ جانە جەلدەتۋ قامتاماسىز ەتىلۋى قاجەت. بارلىق عيماراتتاردا كۇندەلىكتى تازالىق جۇمىستارى جۇرگىزىلىپ، رۇقسات ەتىلگەن دەزينفەكسيا قۇرالدارى قولدانىلۋى كەرەك.
بالالار ءۇشىن كۇنىنە بەس رەت تاماقتانۋ جانە مىندەتتى مەديسينالىق قىزمەت قاراستىرىلۋى ءتيىس.
سۋ ايدىندارى بار ورىنداردا سۋ مەن توپىراقتان سىنامالار الىنىپ، زەرتحانالىق تەكسەرىستەر جۇرگىزىلەدى. جاز بويى سۋ ساپاسىنا تۇراقتى مونيتورينگ جاسالادى.
2026 جىلدىڭ ەكىنشى جارتىسىندا مەملەكەتتىك بيۋدجەت ەسەبىنەن قارجىلاندىرىلاتىن بارلىق بالالار لاگەرلەرى ەرەكشە مەملەكەتتىك باقىلاۋ اياسىندا تەكسەرىلەدى.
سونىمەن قاتار العاش رەت جوسپارلى تەكسەرىستەردىڭ ناقتى ءتىزىمى بەكىتىلەدى. بۇل تىزىمدەر 10 مامىرعا دەيىن سانيتارلىق-ەپيدەميولوگيالىق باقىلاۋ كوميتەتىنىڭ اۋماقتىق بولىمشەلەرىنىڭ سايتتارىندا جاريالانادى.
جاڭا جۇيە اياسىندا تەك جوسپارعا ەنگەن نىساندار عانا ەمەس، ودان تىس لاگەرلەر دە تەكسەرىلەدى.
مينيسترلىك لاگەر يەلەرىنە نىسانداردى الدىن الا دايىنداۋدى، سانيتارلىق-ەپيدەميولوگيالىق قورىتىندى الۋدى، قىزمەتكەرلەرگە قويىلاتىن تالاپتاردى ساقتاۋدى جانە بالالار سانىن بەلگىلەنگەن ليميتتەن اسىرماۋدى ەسكەرتتى.
اتا-انالارعا تەك رەسمي تىزىمدەگى لاگەرلەردى تاڭداۋعا، بالانىڭ دەنساۋلىعىنا نازار اۋدارۋعا جانە مەديسينالىق ەرەكشەلىكتەرى تۋرالى الدىن الا حابارلاۋعا كەڭەس بەرىلدى.
قانداي دا ءبىر زاڭبۇزۋشىلىقتار انىقتالعان جاعدايدا ازاماتتار سانيتارلىق-ەپيدەميولوگيالىق باقىلاۋ ورگاندارىنا جۇگىنە الادى.
مينيسترلىك بالالاردىڭ جازعى دەمالىسى كەزىندەگى قاۋىپسىزدىگى ەرەكشە باقىلاۋدا ەكەنىن اتاپ ءوتتى.
جەرگىلىكتى اتقارۋشى ورگانداردىڭ مالىمەتىنشە، بيىل ەلدە 199 لاگەر جۇمىس ىستەيدى. ونىڭ 20-سى جىل بويى، ال 179-ى ماۋسىمدىق.
