Jýrnalist Dias Nuraqyn Almatydaǵy kópbalaly otbasylarǵa arnalǵan balabaqsha jeńildiginiń toqtatylýyn synǵa aldy, dep habarlaidy Dalanews.kz.
Onyń aitýynsha, buǵan deiin qalada barlyq memlekettik balabaqshalarda kópbalaly otbasylardyń balalary tegin barǵan. Bul shyǵyndy qala biýdjeti kóterip, áleýmettik qoldaý retinde júzege asqan.
Alaida 1 qańtardan bastap bul jeńildik joiylǵan. Nuraqyn muny jańa ákim Darhan Satybaldynyń «únemdeý saiasaty» dep baǵalaidy.
«Almaty ákimdigi biyl biýdjetten bir tiyn bólmedi. Esesine balalardan únemdegen aqshanyń ornyna politseiler 200 mln teńgelik Gelik minip júr, al Tótenshe jaǵdailar departamenti 150 mln teńge turatyn Tesla Cybertruck aldy», – dep jazdy ol.
Jýrnalistiń aitýynsha, bul sheshim kóptegen otbasy úshin aýyr tigen. Óitkeni birneshe jyldan beri balabaqshaǵa tegin úirenip qalǵan ata-analar endi kútpegen shyǵynǵa tap bolǵan.
Nuraqyn qala biýdjeti balalardan jinalǵan qarjy esebinen ósip, naqty damýǵa jumsalsa, qoǵam ony túsiner edi deidi. Biraq qymbat kólikterge ketken shyǵyn áleýmettik ádiletsizdik sezimin kúsheitip otyr dep esepteidi.
