Áleýmettik jelide ánshi Nurlan Espanov pen Sáken Maiǵazievtiń uldarynyń áreketi jurttyń synyna ushyrady. Olar Almatyda ótetin “Qairat” – “Real” matchyna arnalǵan biletterdi qymbat baǵada satqan, dep habarlaidy Dalanews.kz.
Jelide jariialanǵan jazbada Oljas Espanov VIP shaqyrý biletterin joǵary baǵada usynǵany kórinedi.
“Bir bilet baǵasy – 600 myń teńge. 500 myńdyq biletter de bar. Biletter qaita satylymǵa shyqty. Saýdasy bar az-maz. 34 sektor, 9 qatardan eki bilet bar. Árqaisysy 500 myń teńgeden bolady. “Qairat” klýbynyń múshelerine shaqyrý biletter. JSN jazyp kerek emes, skanerlep óte beresiń”, – dep jazǵan ol.
Sáken Maiǵazievtiń uly Ádilet te óz paraqshasynda bilet saýdasyn ashyq túrde jariia etken.
“9, 14, 1, 8-qatarlardan biletter bar. Baǵasy – 350 myń teńge. Tezirek jekege jazyńyzdar”, – dep habarlaǵan ol.
Bul jaǵdai kópshiliktiń narazylyǵyn týdyryp, áleýmettik jeli qoldanýshylary bilettiń qoldan qymbat baǵaǵa satylýyn ashyq synǵa aldy.
Eske salaiyq, buǵan deiin qazaqstandyqtar jelide "Qairat"-"Real" matchine qymbat baǵada bilet sata bastaǵany týraly jazǵan edik.
Threads jelisinde matchke bilet satatyndardyń jarnamasy kóbeigen.
Bilet baǵalary ártúrli: bireýi 170 myń teńgege, endi biri 500 myń teńgege baǵalaǵan.
"250 myń teńgege satyp aldym, 500 myńǵa satamyn. Ózim Almatydamyn, baryp kirgizip jiberemin", - degen bilet satatyndardyń biri.
Eń qymbat baǵa - 1 million 400 myń teńge (eki biletke)
Jazba avtory stadionǵa deiin kirgizip jiberetinin, 30 paiyz mólsherinde aldyn ala tólem jasalýy kerek ekenin, sonymen qatar, bári zańdy ekenin aitqan.
Jeli qoldanýshylarynyń basym bóligi munyń zańsyzdyq ekenin aityp, quzyrly organdardan tekseris júrgizýdi surap otyr. Ázirge "Qairat" fýtbol klýby tarapynan da, quzyrly organdar tarapynan da málimdeme jasalǵan joq.
Buǵan deiingi jaǵdai
23 qyrkúiekte bilet satylymy ashyldy, sanaýly minýtta saittarda uzan sonar kezek paida boldy. Almatydaǵy stadion shamamen 23 000 adamǵa arnalǵan. Al kezekke birden 100 myńnan asa jinaldy.
Eske salaiyq, buǵan deiin bir adamǵa 2 biletten artyq berilmeitini, JSN jáne tólqujat derekteri kórsetilýi kerek ekeni, bul derekter stadionǵa kirgen kezde de tekseriletini aityldy.
Al bilet baǵasy 30 myń men 250 myń teńge aralyǵynda boldy.
