ەلەۋمەتتٸك جەلٸدە ەنشٸ نۇرلان ەسپانوۆ پەن سەكەن مايعازيەۆتٸڭ ۇلدارىنىڭ ەرەكەتٸ جۇرتتىڭ سىنىنا ۇشىرادى. ولار الماتىدا ٶتەتٸن “قايرات” – “رەال” ماتچىنا ارنالعان بيلەتتەردٸ قىمبات باعادا ساتقان, دەپ حابارلايدى Dalanews.kz.
جەلٸدە جارييالانعان جازبادا ولجاس ەسپانوۆ VIP شاقىرۋ بيلەتتەرٸن جوعارى باعادا ۇسىنعانى كٶرٸنەدٸ.
“بٸر بيلەت باعاسى – 600 مىڭ تەڭگە. 500 مىڭدىق بيلەتتەر دە بار. بيلەتتەر قايتا ساتىلىمعا شىقتى. ساۋداسى بار از-ماز. 34 سەكتور, 9 قاتاردان ەكٸ بيلەت بار. ەرقايسىسى 500 مىڭ تەڭگەدەن بولادى. “قايرات” كلۋبىنىڭ مٷشەلەرٸنە شاقىرۋ بيلەتتەر. جسن جازىپ كەرەك ەمەس, سكانەرلەپ ٶتە بەرەسٸڭ”, – دەپ جازعان ول.
سەكەن مايعازيەۆتٸڭ ۇلى ەدٸلەت تە ٶز پاراقشاسىندا بيلەت ساۋداسىن اشىق تٷردە جارييا ەتكەن.
“9, 14, 1, 8-قاتارلاردان بيلەتتەر بار. باعاسى – 350 مىڭ تەڭگە. تەزٸرەك جەكەگە جازىڭىزدار”, – دەپ حابارلاعان ول.
بۇل جاعداي كٶپشٸلٸكتٸڭ نارازىلىعىن تۋدىرىپ, ەلەۋمەتتٸك جەلٸ قولدانۋشىلارى بيلەتتٸڭ قولدان قىمبات باعاعا ساتىلۋىن اشىق سىنعا الدى.
ەسكە سالايىق, بۇعان دەيٸن قازاقستاندىقتار جەلٸدە "قايرات"-"رەال" ماتچٸنە قىمبات باعادا بيلەت ساتا باستاعانى تۋرالى جازعان ەدٸك.
Threads جەلٸسٸندە ماتچكە بيلەت ساتاتىنداردىڭ جارناماسى كٶبەيگەن.
بيلەت باعالارى ەرتٷرلٸ: بٸرەۋٸ 170 مىڭ تەڭگەگە, ەندٸ بٸرٸ 500 مىڭ تەڭگەگە باعالاعان.
"250 مىڭ تەڭگەگە ساتىپ الدىم, 500 مىڭعا ساتامىن. ٶزٸم الماتىدامىن, بارىپ كٸرگٸزٸپ جٸبەرەمٸن", - دەگەن بيلەت ساتاتىنداردىڭ بٸرٸ.
ەڭ قىمبات باعا - 1 ميلليون 400 مىڭ تەڭگە (ەكٸ بيلەتكە)
جازبا اۆتورى ستاديونعا دەيٸن كٸرگٸزٸپ جٸبەرەتٸنٸن, 30 پايىز مٶلشەرٸندە الدىن الا تٶلەم جاسالۋى كەرەك ەكەنٸن, سونىمەن قاتار, بەرٸ زاڭدى ەكەنٸن ايتقان.
جەلٸ قولدانۋشىلارىنىڭ باسىم بٶلٸگٸ مۇنىڭ زاڭسىزدىق ەكەنٸن ايتىپ, قۇزىرلى ورگانداردان تەكسەرٸس جٷرگٸزۋدٸ سۇراپ وتىر. ەزٸرگە "قايرات" فۋتبول كلۋبى تاراپىنان دا, قۇزىرلى ورگاندار تاراپىنان دا مەلٸمدەمە جاسالعان جوق.
بۇعان دەيٸنگٸ جاعداي
23 قىركٷيەكتە بيلەت ساتىلىمى اشىلدى, ساناۋلى مينۋتتا سايتتاردا ۇزان سونار كەزەك پايدا بولدى. الماتىداعى ستاديون شامامەن 23 000 ادامعا ارنالعان. ال كەزەككە بٸردەن 100 مىڭنان اسا جينالدى.
ەسكە سالايىق, بۇعان دەيٸن بٸر ادامعا 2 بيلەتتەن ارتىق بەرٸلمەيتٸنٸ, جسن جەنە تٶلقۇجات دەرەكتەرٸ كٶرسەتٸلۋٸ كەرەك ەكەنٸ, بۇل دەرەكتەر ستاديونعا كٸرگەن كەزدە دە تەكسەرٸلەتٸنٸ ايتىلدى.
ال بيلەت باعاسى 30 مىڭ مەن 250 مىڭ تەڭگە ارالىعىندا بولدى.
