Birikken Arab Ámirlikterindegi «Baraka» atom elektr stantsiiasyna jasalǵan dron shabýylynan keiin álemdik munai baǵasy eki aptalyq maksimýmǵa jetti, dep habarlaidy dalanews.kz.
ice.com saitynyń dereginshe, Astana ýaqytymen tańǵy 7:32-degi saýdada Brent markaly munai fiýchersteriniń baǵasy barreline 111,28 dollarǵa jetken. Al West Texas Intermediate (WTI) munaiy 107,26 dollardan saýdalanǵan.
Sarapshylar munai baǵasynyń qaita kóterilýin AQSh pen Iran arasyndaǵy kelissózderdiń tyǵyryqqa tirelýimen bailanystyryp otyr.
AES aýmaǵynda órt shyqqan
Eske salsaq, BAÁ-degi «Baraka» atom elektr stantsiiasyna dronmen jasalǵan shabýyldan keiin órt shyqqan. Bul týraly jeksenbi kúni eldiń resmi organdary habarlady.
Órt Al-Dafra aimaǵyndaǵy AES-tiń ishki perimetrinen tys ornalasqan elektr generatorynda bolǵan. Abý-Dabi emiratynyń arnaiy qyzmetteri oqiǵa ornyna jedel áreket etken.
Ázirge qaza tapqandar men zardap shekkender týraly aqparat joq. BAÁ-niń Iadrolyq retteý jónindegi federaldyq basqarmasy órt stantsiia qaýipsizdigine jáne negizgi júielerdiń jumysyna áser etpegenin málimdedi.
MAGATE málimdeme jasady
Halyqaralyq atom energiiasy agenttigi (MAGATE) BAÁ biligine silteme jasap, «Baraka» AES-indegi radiatsiia deńgeii qalypty jaǵdaida ekenin habarlady.
Vedomstvo jaǵdaidy jiti baqylap otyrǵanyn jáne qajet bolǵan jaǵdaida kómek kórsetýge daiyn ekenin málimdedi.
MAGATE basshysy Rafael Grossi oqiǵaǵa bailanysty «alańdaýshylyq» bildirip, iadrolyq qaýipsizdikke qaýip tóndiretin áskeri áreketterge jol berýge bolmaitynyn aitty.
BAÁ jaýap berýge daiyn ekenin málimdedi
BAÁ biligi shabýyldyń qaidan jasalǵanyn anyqtap jatqanyn habarlady. Sonymen qatar el mundai «terroristik shabýyldarǵa» jaýap qaitarýǵa tolyq quqyly ekenin málimdedi.
Al BAÁ prezidentiniń diplomatiialyq keńesshisi bul jaǵdaidy Taiaý Shyǵystaǵy qaýipti shielenistiń jańa kezeńi dep baǵalady.
