2 shildede Ázerbaijan Respýblikasynyń Syrtqy ister ministrligi Resei Federatsiiasynyń Bakýdegi tótenshe jáne ókiletti elshisi Mihail Evdokimovti ministrlikke shaqyryp, resmi narazylyq notasyn tabystady. Ázerbaijan tarapy Reseidiń ekijaqty qarym-qatynasqa keri áser etken áreketterin synǵa aldy. Bul týraly aqparat eldiń SIM resmi saitynda paida boldy, dep habarlaidy Dalanews.kz.
Kezdesý barysynda ministr orynbasary Araz Ázimov 27 maýsymda Ekaterinbýrg qalasynda ázerbaijandyqtardyń úilerine júrgizilgen reidke bailanysty tereń alańdaýshylyq bildirdi. Bul operatsiia kezinde eki azamat qaza taýyp, birnesheýi aýyr jaraqat alǵan. Ázerbaijan tarapy qaza tapqandardyń denesindegi zorlyq belgileri men meditsinalyq saraptama qorytyndysy Resei tarapy taratqan resmi aqparatpen sáikes kelmeitinin atap ótti. Sonymen qatar, reseilik BAQ-taǵy etnikalyq negizdegi jaǵymsyz ritorika men ázerbaijan azamattaryna «etnostyq qylmystyq top» dep aidar taǵý áreketteri qatań synǵa alyndy.
Baký Máskeýden bul oqiǵaǵa bailanysty tolyq ári ádil tergeý júrgizip, kinálilerdi jaýapqa tartýdy, sondai-aq zardap shekkenderge ótemaqy tóleýdi talap etti. Ázerbaijan tarapy bul ustanymdy Reseidiń ishki isine aralasý retinde baǵalaý orynsyz ekenin alǵa tartty.
Sondai-aq, kezdesýde «Sputnik-Ázerbaijan» agenttigine qatysty júrgizilgen sharalarǵa bailanysty Resei tarapynan aitylǵan syn-eskertpelerge de jaýap berildi. Ázerbaijan bul sharalardyń el zańnamasyna sai júrgizilgenin jáne qazirgi tańda tergeý amaldary jalǵasyp jatqanyn málimdedi. Máskeýdiń narazylyǵy negizsiz dep tanyldy.
Bakýdiń aitýynsha, byltyrǵy jyldyń sońynda Ázerbaijanǵa tiesili ushaqtyń Resei áýe keńistiginde oqqa ushý faktisinen keiin tiisti sharalardyń qabyldanbaýy, sondai-aq reseilik aqparat quraldary men keibir resmi tulǵalardyń Ázerbaijanǵa qarsy jalǵan aqparat taratýy da ekijaqty qatynasqa keri áser etip otyr.
Ázerbaijan tarapy Reseiden bul oqiǵa boiynsha ashyq tergeý júrgizýdi, kinálilerdi jaýapqa tartýdy jáne keltirilgen ziiandy óteýdi kútetinin málimdedi. Bul qadamdar ekijaqty qatynastaǵy shielenisti joiý úshin mańyzdy dep sanaidy.
Kezdesý barysynda sońǵy 4-5 aida Reseidiń qoǵamdyq-saiasi qairatkerleri men mediasy tarapynan Ázerbaijannyń egemendigi men aýmaqtyq tutastyǵyna qarsy málimdemeler jiilegeni jáne bul faktorlar eki el arasyndaǵy qarym-qatynasty ýshyqtyra túskeni aityldy.
Ázerbaijan tarapy Reseidiń sońǵy áreketteri dostyq pen ózara qurmetke negizdelgen qatynasqa sai kelmeitinin jáne bul jaǵdai qosymsha shieleniske sebep bolǵanyn resmi túrde jetkizdi. Baký Máskeýdi eki el arasyndaǵy shielenisti azaitý maqsatynda naqty ári tiimdi sharalar qabyldaýǵa shaqyrdy.
