2 شىلدەدە ازەربايجان رەسپۋبليكاسىنىڭ سىرتقى ىستەر مينيسترلىگى رەسەي فەدەراسياسىنىڭ باكۋدەگى توتەنشە جانە وكىلەتتى ەلشىسى ميحايل ەۆدوكيموۆتى مينيسترلىككە شاقىرىپ، رەسمي نارازىلىق نوتاسىن تابىستادى. ازەربايجان تاراپى رەسەيدىڭ ەكىجاقتى قارىم-قاتىناسقا كەرى اسەر ەتكەن ارەكەتتەرىن سىنعا الدى. بۇل تۋرالى اقپارات ەلدىڭ ءسىم رەسمي سايتىندا پايدا بولدى، دەپ حابارلايدى Dalanews.kz.

كەزدەسۋ بارىسىندا مينيستر ورىنباسارى اراز ءازىموۆ 27 ماۋسىمدا ەكاتەرينبۋرگ قالاسىندا ازەربايجاندىقتاردىڭ ۇيلەرىنە جۇرگىزىلگەن رەيدكە بايلانىستى تەرەڭ الاڭداۋشىلىق ءبىلدىردى. بۇل وپەراسيا كەزىندە ەكى ازامات قازا تاۋىپ، بىرنەشەۋى اۋىر جاراقات العان. ازەربايجان تاراپى قازا تاپقانداردىڭ دەنەسىندەگى زورلىق بەلگىلەرى مەن مەديسينالىق ساراپتاما قورىتىندىسى رەسەي تاراپى تاراتقان رەسمي اقپاراتپەن سايكەس كەلمەيتىنىن اتاپ ءوتتى. سونىمەن قاتار، رەسەيلىك باق-تاعى ەتنيكالىق نەگىزدەگى جاعىمسىز ريتوريكا مەن ازەربايجان ازاماتتارىنا «ەتنوستىق قىلمىستىق توپ» دەپ ايدار تاعۋ ارەكەتتەرى قاتاڭ سىنعا الىندى.

باكۋ ماسكەۋدەن بۇل وقيعاعا بايلانىستى تولىق ءارى ءادىل تەرگەۋ جۇرگىزىپ، كىنالىلەردى جاۋاپقا تارتۋدى، سونداي-اق زارداپ شەككەندەرگە وتەماقى تولەۋدى تالاپ ەتتى. ازەربايجان تاراپى بۇل ۇستانىمدى رەسەيدىڭ ىشكى ىسىنە ارالاسۋ رەتىندە باعالاۋ ورىنسىز ەكەنىن العا تارتتى.

سونداي-اق، كەزدەسۋدە «Sputnik-ازەربايجان» اگەنتتىگىنە قاتىستى جۇرگىزىلگەن شارالارعا بايلانىستى رەسەي تاراپىنان ايتىلعان سىن-ەسكەرتپەلەرگە دە جاۋاپ بەرىلدى. ازەربايجان بۇل شارالاردىڭ ەل زاڭناماسىنا ساي جۇرگىزىلگەنىن جانە قازىرگى تاڭدا تەرگەۋ امالدارى جالعاسىپ جاتقانىن مالىمدەدى. ماسكەۋدىڭ نارازىلىعى نەگىزسىز دەپ تانىلدى.

باكۋدىڭ ايتۋىنشا، بىلتىرعى جىلدىڭ سوڭىندا ازەربايجانعا تيەسىلى ۇشاقتىڭ رەسەي اۋە كەڭىستىگىندە وققا ۇشۋ فاكتىسىنەن كەيىن ءتيىستى شارالاردىڭ قابىلدانباۋى، سونداي-اق رەسەيلىك اقپارات قۇرالدارى مەن كەيبىر رەسمي تۇلعالاردىڭ ازەربايجانعا قارسى جالعان اقپارات تاراتۋى دا ەكىجاقتى قاتىناسقا كەرى اسەر ەتىپ وتىر.

ازەربايجان تاراپى رەسەيدەن بۇل وقيعا بويىنشا اشىق تەرگەۋ جۇرگىزۋدى، كىنالىلەردى جاۋاپقا تارتۋدى جانە كەلتىرىلگەن زياندى وتەۋدى كۇتەتىنىن مالىمدەدى. بۇل قادامدار ەكىجاقتى قاتىناستاعى شيەلەنىستى جويۋ ءۇشىن ماڭىزدى دەپ سانايدى.

كەزدەسۋ بارىسىندا سوڭعى 4-5 ايدا رەسەيدىڭ قوعامدىق-ساياسي قايراتكەرلەرى مەن مەدياسى تاراپىنان ازەربايجاننىڭ ەگەمەندىگى مەن اۋماقتىق تۇتاستىعىنا قارسى مالىمدەمەلەر جيىلەگەنى جانە بۇل فاكتورلار ەكى ەل اراسىنداعى قارىم-قاتىناستى ۋشىقتىرا تۇسكەنى ايتىلدى.

ازەربايجان تاراپى رەسەيدىڭ سوڭعى ارەكەتتەرى دوستىق پەن ءوزارا قۇرمەتكە نەگىزدەلگەن قاتىناسقا ساي كەلمەيتىنىن جانە بۇل جاعداي قوسىمشا شيەلەنىسكە سەبەپ بولعانىن رەسمي تۇردە جەتكىزدى. باكۋ ماسكەۋدى ەكى ەل اراسىنداعى شيەلەنىستى ازايتۋ ماقساتىندا ناقتى ءارى ءتيىمدى شارالار قابىلداۋعا شاقىردى.