Avtor “Azattyq ańsaǵan” derekti hikaiatynda Qazaqstandaǵy Saiasi repressiia taqyrybyn ózek etip alǵan. Eńbekte repressiia tuzaǵyna túsken bútindei bir Aitmurzaevtar áýletiniń taǵdyry arqaý bolǵan. 1937 jyldardaǵy repressiianyń qandy sheńgeline ilikken Shamaqan Jálik Aitmurzaev atalarynyń basyna túsken qasiretin urpaǵy - balalary, nemereleri, shóbereleri de zardabyn kórgendigi baiandalǵan. Al atasynyń úshinshi urpaǵy - 1986 jylǵy Almaty qalasyndaǵy Jeltoqsan kóterilisin uiymdastyrýshylardyń biri - Qurmanǵazy Aitmurzaevtyń qily ómiri týrasynda da avtor oi tolǵaidy.
Kitapta sol kezdegi Almaty qalasyndaǵy Teatr jáne kórkemsýret institýtynyń stýdenti Qurmanǵazy Aitmurzaevtyń kezinde repressiiaǵa ushyraǵan atasy týrasynda, óziniń dostarymen birge Jeltoqsan kóterilisin tikelei uiymdastyryp, túrmeniń kermek dámin tatqany jaiynda jáne odan keiingi kezde azamattyq ustanymyn kórsetken qaisar azamattyń taǵdyry týraly syr shertiledi. Sondai-aq avtor Jeltoqsan kóterilisine qatysty maǵlumattardy da naqty derektermen dáiekteidi, jeltoqsandyq qaharman keiipkeriniń bolmysyn ashýǵa umtyla otyryp, Jeltoqsan kóterilisiniń beimálim qyrlaryn baiandaidy.
Kitaptyń jaryq kórýine demeýshilik jasaǵan kásipker, belgili metsenat, ultjandy azamat, Jeltoqsan kóterilisine qatysýshy qaharmandardyń biri, kitap keiipkeri Qurmanǵazy Aitmurzaevtyń dosy Nurlan Esqaliev.
Eńbek jalpy tarihshylarǵa, Repressiia taqyrybyna, Jeltoqsan kóterilisine qyzyǵýshylyq tanytqan barsha oqyrmanǵa, qalyń qaýymǵa, jastarǵa, joǵary oqý oryndarynyń stýdentterine arnalǵan. Avtor tarihi aqtańdaqtar máselesin búgingi kózqaras turǵysynan jiti saralaǵan, jete zerttegen. Kitap keiipkeriniń taǵdyr talaiy men taǵylymynan jurtshylyqqa, ásirese jastarǵa alar tálim jeterlik. Kitap qarapaiym tilmen jazylǵan. Myń dana taralymmen jaryq kórgen atalǵan kitap kórkem bezendirilgen.
Kitap úsh taraýdan turady. Birinshi taraýda "Azattyq ańsaǵan" derekti hikaiaty, ekinshi taraýda kitap keiipkeri týraly «Serke» derekti film stsenariii, al úshinshi taraýda avtordyń «Jeltoqsan qaharmany» Qurmanǵazy Aitmurzaevty nasihattaý barysyndaǵy sharalardan materialdar berilgen.
Tusaýkeserge jeltoqsan qairatkerleri, tarihshylar jáne ziialy qaýym ókilderi qatysyp, atalǵan eńbekke joǵary baǵalaryn berdi.
