Shymkent qalasyndaǵy qoǵamdyq kólik 100 jańa avtobýspen tolyǵyp, 6 jańa baǵyt ashyldy. Qoǵamdyq kólikterdiń kiltin tabystaýǵa qala ákimi M.Áitenov qatysyp qyzmetkerlerge sáttilik tiledi.
Memleket basshysynyń halyqqa qolaily jaǵdai jasaý tapsyrmasy aiasynda qalada júieli jumystar atqarylyp jatqanyn aitqan qala basshysy qaladaǵy qoǵamdyq kólik biylǵy jyly 80 paiyzǵa jańaratynyn aitty.
«Qalamyz halyqqa qolaily bolý úshin qoǵamdyq kólik júiesin odan ári damytamyz. Byltyr 590 jańa avtobýs satyp alynyp, onyń 200 iske qosylǵan bolatyn. Mine búgin qoǵamdyq kólik taǵy jańa 100 avtobýspen tolyǵyp otyr. Qalǵan avtobýstardy da ret-retimen iske qosatyn bolamyz. Sonda qoǵamdyq kólik 80 paiyzǵa jańarady. Bul avtobýstar gazben júredi, konditsioneri bar, múmkinshiligi shekteýli azamattarymyzǵa qolaily»,-dedi qala ákimi.
Sonymen qatar ákim qoǵamdyq kólik júrgizýshileri birinshi kezekte mádenietti bolý kerek ekendigin atap ótti.
Búginge deiin, megapoliste 71 baǵyt bolsa, endi qosymsha 6 baǵytqa tolyǵyp, qoǵamdyq kólikterdiń sany 880 avtobýsqa jetti. Endigi jerde jańa avtobýstar Samal 3, Aq jaiyq, Kúnshyǵys, Hamza, Shymsiti, Qaitpas 1 móltek aýdandaryna júretin bolady.
Ótken aida Shymkent qalasynda kún saiyn 200 avtobýsqa qyzmet kórsetýge múmkindik beretin metan gazyn toltyratyn kompressorlyq stantsiia iske qosylǵan bolatyn. Aldaǵy ýaqytta kún saiyn 300 avtobýsqa qyzmet kórsetýge múmkindik beretin qalada taǵy bir kompressordy iske qosý josparlanǵan.
Eger de qoǵamdyq kólikterdiń keshigýi júrgizýshilerdiń dóreki sóileýi jáne basqa da qoǵamdyq kólikke qatysty saýaldaryńyz týyndasa @Shymkent «109» biryńǵai bailanys nómirine habarlasýlaryńyzǵa bolady.
