Qabyldaýǵa 100-ge jýyq azamat jazylyp, ótinishterin bildirdi. Turǵyndar negizinen turǵyn úi, áleýmettik sala jáne infraqurylym máseleleri jónindegi talap-tilekterin jetkizdi.
«Túrkistan» saraiynda ótken biryńǵai qabyldaýda qala ákiminiń orynbasarlary men basqarma basshylary da turǵyndardyń jeke máselesin tyńdady.
Ákim qabyldaýyna kelgen «Samal-1» shaǵyn aýdanynyń kórshisiniń úii joldyń jiegine ornalasýyna bailanysty úiine kirip-shyǵý joly jabylyp qalǵanyn jáne úidiń yńǵaisyz orynǵa ornalasqany úshin sol kóshedegi kólik qozǵalysyna kedergi keltirip otyrǵanyn jetkizdi.
Qala ákimi bul azamattyń ótinishin jeke baqylaýyna alyp, tiisti jumystardy uiymdastyrýdy jolaýshylar kóligi jáne avtomobil joldary basqarmasy basshysyna tapsyrdy. Qazir qalalyq jolaýshylar kóligi jáne avtomobil joldary basqarmasyna jol jiegine yńǵaisyz salynǵan turǵyn úidi memleket muqtajyna alý týraly usynys joldanǵan.
Eńbekshi aýdanynyń turǵyny qala ákiminen baspana alýǵa járdem berýdi surady. Azamatsha buǵan deiin turǵyn úi kezegine tirkelmegen. Ieliginde turǵyn úi bolǵandyqtan kezekke tirkelý múmkindigi joq.
Qala ákimi memlekettik turǵyn úi qorynan beriletin páterler tek belgilengen tártippen kezek arqyly úlestiriletinin atap ótti. Qazir qalada turǵyn úi alý tiziminde 48 623 azamat tirkelgen. Sonyń ishinde 1 819 ata-anasynyń qamqorlyǵynsyz qalǵan bala, 9 186 kópbalaly otbasy, 16 957 halyqtyń áleýmettik jaǵynan álsiz toby, 20 634 biýdjettik qyzmetshiler jáne úii apatty jaǵdaida dep tanylǵan 27 azamat bar.
Búgingi biryńǵai qabyldaýǵa jazylǵan birqatar turǵyn jer telimderi boiynsha máselerin kóterdi. Murat Áitenov turǵyndardyń ótinishterin muqiiat tyńdap, jer ýchaskelerin zańdastyrý boiynsha týyndaǵan barlyq máseleler zań talaptary aiasynda sheshiletinin málimdedi.
