قابىلداۋعا 100-گە جۋىق ازامات جازىلىپ، وتىنىشتەرىن ءبىلدىردى. تۇرعىندار نەگىزىنەن تۇرعىن ءۇي، الەۋمەتتىك سالا جانە ينفراقۇرىلىم ماسەلەلەرى جونىندەگى تالاپ-تىلەكتەرىن جەتكىزدى.
«تۇركىستان» سارايىندا وتكەن ءبىرىڭعاي قابىلداۋدا قالا اكىمىنىڭ ورىنباسارلارى مەن باسقارما باسشىلارى دا تۇرعىنداردىڭ جەكە ماسەلەسىن تىڭدادى.
اكىم قابىلداۋىنا كەلگەن «سامال-1» شاعىن اۋدانىنىڭ كورشىسىنىڭ ءۇيى جولدىڭ جيەگىنە ورنالاسۋىنا بايلانىستى ۇيىنە كىرىپ-شىعۋ جولى جابىلىپ قالعانىن جانە ءۇيدىڭ ىڭعايسىز ورىنعا ورنالاسقانى ءۇشىن سول كوشەدەگى كولىك قوزعالىسىنا كەدەرگى كەلتىرىپ وتىرعانىن جەتكىزدى.
قالا اكىمى بۇل ازاماتتىڭ ءوتىنىشىن جەكە باقىلاۋىنا الىپ، ءتيىستى جۇمىستاردى ۇيىمداستىرۋدى جولاۋشىلار كولىگى جانە اۆتوموبيل جولدارى باسقارماسى باسشىسىنا تاپسىردى. ءقازىر قالالىق جولاۋشىلار كولىگى جانە اۆتوموبيل جولدارى باسقارماسىنا جول جيەگىنە ىڭعايسىز سالىنعان تۇرعىن ءۇيدى مەملەكەت مۇقتاجىنا الۋ تۋرالى ۇسىنىس جولدانعان.
ەڭبەكشى اۋدانىنىڭ تۇرعىنى قالا اكىمىنەن باسپانا الۋعا جاردەم بەرۋدى سۇرادى. ازاماتشا بۇعان دەيىن تۇرعىن ءۇي كەزەگىنە تىركەلمەگەن. يەلىگىندە تۇرعىن ءۇي بولعاندىقتان كەزەككە تىركەلۋ مۇمكىندىگى جوق.
قالا اكىمى مەملەكەتتىك تۇرعىن ءۇي قورىنان بەرىلەتىن پاتەرلەر تەك بەلگىلەنگەن تارتىپپەن كەزەك ارقىلى ۇلەستىرىلەتىنىن اتاپ ءوتتى. ءقازىر قالادا تۇرعىن ءۇي الۋ تىزىمىندە 48 623 ازامات تىركەلگەن. سونىڭ ىشىندە 1 819 اتا-اناسىنىڭ قامقورلىعىنسىز قالعان بالا، 9 186 كوپبالالى وتباسى، 16 957 حالىقتىڭ الەۋمەتتىك جاعىنان ءالسىز توبى، 20 634 بيۋدجەتتىك قىزمەتشىلەر جانە ءۇيى اپاتتى جاعدايدا دەپ تانىلعان 27 ازامات بار.
بۇگىنگى ءبىرىڭعاي قابىلداۋعا جازىلعان ءبىرقاتار تۇرعىن جەر تەلىمدەرى بويىنشا ماسەلەرىن كوتەردى. مۇرات ايتەنوۆ تۇرعىنداردىڭ وتىنىشتەرىن مۇقيات تىڭداپ، جەر ۋچاسكەلەرىن زاڭداستىرۋ بويىنشا تۋىنداعان بارلىق ماسەلەلەر زاڭ تالاپتارى اياسىندا شەشىلەتىنىن مالىمدەدى.
