Marqum Saltanat Núkenovanyń aǵasy Aitbek Amangeldi eks-ministr Qýandyq Bishimbaevtan 1,5 mlrd teńge moraldyq shyǵyn talap etken, - dep habarlaidy Dalanews.kz Azattyq Rýhy-ke siltep.
Sot kabinetindegi málimetke súiensek, Núkenovanyń aǵasy materialdyq shyǵyndy 8,8 mln teńgege baǵalaǵan.
«Aryz bergen adam qaryndasynan aiyrylǵan soń ózi de, ata-anasy da qatty qaiǵyrǵandaryn, sondyqtan, densaýlyqtary nasharlap, jumysqa qabiletsiz bolǵandaryn alǵa tartty. S.Núkenovanyń ata-anasy únemi qaiǵy-muńǵa batyp júredi: osydan baryp, uiyqtamai, densaýlyqtary nasharlap, ashý-yzaǵa berilip, jandary aýyrady. Densaýlyqtaryna bailanysty únemi emdeledi. Aryz jazýshy qaryndasynyń ólimine qatysty sot kezinde advokattardyń júrip-turýyna, qonaq úilerine aqsha tólegen. Bishimbaevtan 8 828 070 teńge kóleminde materialdyq shyǵyn jáne 1,5 mlrd teńge kóleminde moraldyq shyǵyn talap etti», - dep jazylǵan sot kabinetindegi qujatta.
Eske salaiyq, buǵan deiin Astana qalasynyń azamattyq ister jónindegi aýdanaralyq sotynda Aitbek Amangeldiniń jaýapker Qýandyq Bishimbaevtan materialdyq shyǵyn men moraldyq ziiandy óndirý týraly talabymen is qaraldy.
«Aǵasy qaiǵyly oqiǵa saldarynan moraldyq azap shekkenin, densaýlyǵy nasharlaǵanyn jáne qaiǵyly oqiǵaǵa bailanysty eńbekke qabilettiligin joǵaltqanyn kórsetken. Marqumnyń ata-anasy talap qoiýshynyń paidasyna óndirýden bas tartqan. Talap qoiýda qylmystyq is aiasynda zań qyzmetterine tóleýge ketken shyǵyndar da talap etildi. Sot jaqyn týysynyń qaitys bolýy talap qoiýshynyń moraldyq jaǵdaiyna keri áserin tigizip, onyń jeke múliktik emes quqyqtaryn buzǵanyn eskere otyryp, talapty ishinara qanaǵattandyrdy», – dep jazylǵan habarlamada.
Jaýapkerden qylmystyq is boiynsha keltirilgen 6 877 672 teńge materialdyq shyǵyn men 10 million teńge moraldyq ziian óndirildi.
