مارقۇم سالتانات نۇكەنوۆانىڭ اعاسى ايتبەك امانگەلدى ەكس-مينيستر قۋاندىق بيشىمبايەۆتان 1،5 ملرد تەڭگە مورالدىق شىعىن تالاپ ەتكەن، - دەپ حابارلايدى Dalanews.kz Azattyq Rýhy-كە سىلتەپ.

سوت كابينەتىندەگى مالىمەتكە سۇيەنسەك، نۇكەنوۆانىڭ اعاسى ماتەريالدىق شىعىندى 8،8 ملن تەڭگەگە باعالاعان.

«ارىز بەرگەن ادام قارىنداسىنان ايىرىلعان سوڭ ءوزى دە، اتا-اناسى دا قاتتى قايعىرعاندارىن، سوندىقتان، دەنساۋلىقتارى ناشارلاپ، جۇمىسقا قابىلەتسىز بولعاندارىن العا تارتتى. س.نۇكەنوۆانىڭ اتا-اناسى ۇنەمى قايعى-مۇڭعا باتىپ جۇرەدى: وسىدان بارىپ، ۇيىقتاماي، دەنساۋلىقتارى ناشارلاپ، اشۋ-ىزاعا بەرىلىپ، جاندارى اۋىرادى. دەنساۋلىقتارىنا بايلانىستى ۇنەمى ەمدەلەدى. ارىز جازۋشى قارىنداسىنىڭ ولىمىنە قاتىستى سوت كەزىندە ادۆوكاتتاردىڭ ءجۇرىپ-تۇرۋىنا، قوناق ۇيلەرىنە اقشا تولەگەن. بيشىمبايەۆتان 8 828 070 تەڭگە كولەمىندە ماتەريالدىق شىعىن جانە 1،5 ملرد تەڭگە كولەمىندە مورالدىق شىعىن تالاپ ەتتى»، - دەپ جازىلعان سوت كابينەتىندەگى قۇجاتتا.

ەسكە سالايىق، بۇعان دەيىن استانا قالاسىنىڭ ازاماتتىق ىستەر جونىندەگى اۋدانارالىق سوتىندا ايتبەك امانگەلدىنىڭ جاۋاپكەر قۋاندىق بيشىمبايەۆتان ماتەريالدىق شىعىن مەن مورالدىق زياندى ءوندىرۋ تۋرالى تالابىمەن ءىس قارالدى.

«اعاسى قايعىلى وقيعا سالدارىنان مورالدىق ازاپ شەككەنىن، دەنساۋلىعى ناشارلاعانىن جانە قايعىلى وقيعاعا بايلانىستى ەڭبەككە قابىلەتتىلىگىن جوعالتقانىن كورسەتكەن. مارقۇمنىڭ اتا-اناسى تالاپ قويۋشىنىڭ پايداسىنا وندىرۋدەن باس تارتقان. تالاپ قويۋدا قىلمىستىق ءىس اياسىندا زاڭ قىزمەتتەرىنە تولەۋگە كەتكەن شىعىندار دا تالاپ ەتىلدى. سوت جاقىن تۋىسىنىڭ قايتىس بولۋى تالاپ قويۋشىنىڭ مورالدىق جاعدايىنا كەرى اسەرىن تيگىزىپ، ونىڭ جەكە مۇلىكتىك ەمەس قۇقىقتارىن بۇزعانىن ەسكەرە وتىرىپ، تالاپتى ءىشىنارا قاناعاتتاندىردى»، – دەپ جازىلعان حابارلامادا.

جاۋاپكەردەن قىلمىستىق ءىس بويىنشا كەلتىرىلگەن 6 877 672 تەڭگە ماتەريالدىق شىعىن مەن 10 ميلليون تەڭگە مورالدىق زيان ءوندىرىلدى.