Memleket basshysy Qasym-Jomart Toqaev barlyq deńgeidegi máslihat depýtattarynyń III respýblikalyq forýmynda sóz sóiledi, dep habarlaidy Dalanews.kz.
Prezident jiynda aimaqtarǵa bólinetin biýdjetke qatysty pikir bildirdi.
"Aimaqtar óz biýdjetin muqiiat josparlap, tabysyn arttyrýǵa basa mán berýge tiis. Biz jergilikti biliktiń áleýetin jáne aimaqtardyń qarjylyq derbestigin birtindep kúsheitip jatyrmyz. Byltyr aýyldyq okrýgterdiń biýdjeti 442 milliard teńgeden asty. Bul qarajattyń úshten biri – eldi mekenderdiń óz tabysy. Onyń ústine, elimizdegi aýyldyq okrýgterdiń ortasha biýdjeti 190 million teńgege jetti. Bul – edáýir jaqsy kórsetkish", - deidi prezident.
Biyldan bastap aýyldyq okrýgter qosymsha tabys kózine ie bolmaq. Atap aitqanda, keń taralǵan paidaly qazbalar óndirisine, jerasty sýlary men emdik balshyqtardy paidalanýǵa salynatyn salyqty ózderi jinap, qajetine jaratady.
"Meniń tapsyrmama sáikes qazir Úkimet zańdy tulǵalarǵa jáne jeke kásipkerlerge salynatyn múlik salyǵynyń bir bóligin tórtinshi deńgeidegi biýdjetterge berý máselesin pysyqtap jatyr. Sondai-aq aimaqtarǵa jekelegen qyzmet túrimen ainalysýǵa arnalǵan litsenziialyq alymnan, ekologiialyq aiyppuldardan túsetin qarajat ta berilýi múmkin. Bul – óte durys ustanym. Túsken tabys, eń aldymen, sol aimaqty damytýǵa jumsalýy kerek. Bir sózben aitqanda, jergilikti jerde qordalanǵan máselelerdi sheshý úshin múmkindik te, resýrs ta arta túspek", - deidi Memleket basshysy.
