Aımaǵambetovtiń sózinshe, jyl basynda muǵalimderdiń, aýyl dırektorlary men dırektor orynbasarlarynyń, qala mektepteriniń, bilim bólimderi men bilim basqarmalary ókilderiniń qatysýymen pedagogterdiń attestasıadan ótý júıesin jetildirý boıynsha jumys toby qurylǵan.
Jumys toby ádistemege, árbir biliktilik sanatyna qoıylatyn talaptarǵa, kútiletin nátıjelerge, kásibı standarttyń ózara baılanysyna jáne t.b. qatysty óz usynystaryn jasaǵan.
Qazirgi ýaqytta barlyq pedagog attestasıanyń eki kezeńinen ótedi: birinshi kezeń - barlyq pedagogtiń pán men oqytý ádistemesin bilýge arnalǵan testileýden mindetti túrde ótýi jáne ekinshi kezeń-pedagog portfolıosyn, jetistikterin baǵalaý.
Attestasıaǵa mynadaı ózgerister usynylady. Birinshi kezeńge, ıaǵnı UBT-ǵa (Ulttyq biliktilik testi) qatysty.
1. Ádisteme boıynsha testileý suraqtaryn qamtıtyn tolyq taqyryptar men ádebıetter barlyǵyna qoljetimdi bolady.
2. Pedagogıkalyq ótili 30 jyl jáne jańa attestasıa júıesi boıynsha sanaty bar pedagogterdi biliktilik testileýden bosatý usynylady.
Olar attestasıanyń ekinshi kezeńinen ǵana ótedi, ıaǵnı portfolıo tapsyrady. Bul rette eger olar biliktilik sanatyn kótergisi kelse, onda attestasıa jalpy negizde ótedi.
Mysaly, 30 jyldyq eńbek ótili bar pedagog-sarapshy óz sanatyn rastasa, attestasıadan tek ekinshi kezeńnen UBT-syz ótedi, al arttyrǵysy kelse qosymsha UBT tapsyrady.
3. Sondaı-aq pedagogıkalyq ótili 30 jyl, biraq eski atestattaý júıesi boıynsha joǵary, birinshi sanatty pedagogter, "pedagog-moderator" sanatyna aýysatyn bolsa, onda olar biliktilik testileýden ótýden bosatylady. Bul jaǵdaıda olar attestasıanyń ekinshi kezeńinen ótedi, ıaǵnı portfolıo tapsyrady. Al eger bul pedagogter attestasıanyń jańa júıesi boıynsha basqa sanattardy alǵysy kelse, onda attestasıa jalpy negizde ótedi.
4. Zeınetke shyǵýyna 4 jyl qalǵan muǵalimder de jańa júıe boıynsha bar sanatyn rastaǵan jaǵdaıda olardy attestasıadan bosatý usynylady. Al eger olar qoldanystaǵy biliktilik sanatyn, tıisinshe alatyn ústemaqysyn arttyrǵysy kelse, onda attestasıa jalpy negizde ótedi.
Attestasıanyń ekinshi kezeńinde de ózgerister bolady.
1. Qujattardyń sany aıtarlyqtaı qysqarady. Ekinshi kezeńdegi negizgi baǵalaý krıterııleri: sabaqqa qatysýy jáne ony taldaýy, pedagogtiń biliktilikti arttyrý kýrstarynan ótýi. UBDQ-da ár muǵalim úshin mańyzdy aqparaty bar elektrondy portfolıo qurý josparlanyp otyr, muǵalimder attestasıa kezinde málimetterdi sol jerden ala alady.
2. Oqýshylardyń bilim sapasy týraly aqparat aqparattyq júıelerden avtomatty túrde alynady.
3. Pedagogtiń kásibı jetistikteri men oqýshylardyń jetistikterine keletin bolsaq (olımpıadalar men konkýrstar), olımpıadalar men konkýrstardyń tizbesi aıtarlyqtaı keńeıtiledi.
4. Sabaqtardyń beınejazbalary mindetti bolmaıdy, onyń ornyna qatysqan sabaqqa jáne lesson study taldaý jasalady.
5. Sonymen qatar testileýden ótý tártibin buzǵan jáne óz jetistikteri týraly jalǵan aqparat kórsetken tulǵalarǵa 5 jylǵa attestasıadan ótýge tyıym salatyn normany engizý usynyldy.
6. Pedagogıkalyq qyzmetke alǵash ret kiriskender "pedagog-taǵylymger" ýaqytsha biliktiligin alyp, bir jylǵa jumysqa qabyldanady, sodan keıin olarda mamandyqqa beıimdelý, ený baǵdarlamasy bastalady. Bul baǵdarlama boıynsha jas mamanǵa tálimger bekitilip, onyń kásibı damý baǵdarlamasy ázirlenedi, kýrstardan ótip, lesson study júrgizedi jáne baǵdarlama qorytyndysy boıynsha pedagogıkalyq keńes "pedagog" sanatyn berý jáne shartty uzartý týraly tıisti sheshim qabyldaıdy.
7. Attestasıa merzimin 3 jylǵa deıin qysqartpaı, 5 jylda bir ret, ıaǵnı sol kúıinde qaldyrý týraly sheshim qabyldandy.
Ashat Aımaǵambetov qabyldanyp jatqan sharalardyń muǵalimderge ózderiniń biliktilik deńgeıin arttyrý máselelerine tıimdirek qaraýǵa múmkindik berip, negizgi mindetti, ıaǵnı bilim sapasyn arttyrýdy sheshetinine senim bildirgen.
https://dalanews.kz/aimak/80915-qasymbek-qayda-qarap-otyr-temirtau
