Astanadaǵy áskeri sottyń apelliatsiialyq alqasy Arman Jumannyń advokattarynyń ótinishi boiynsha úzilis jasady. Aita keteiik, Arman Juman – qańtar oqiǵasy kezinde tórt jasar Aikórkemdi atyp jiberdi degen kúdikke ilingen áskeri. Sot otyrysy sanaýly minýttarǵa ǵana sozylyp, sot úziliske ketip qalǵan, - dep habarlaidy Dalanews.kz.
"Kúdikke ilingen áskeridiń advokattary keshe Almatyǵa ushyp ketken eken, al búgin sot kabineti arqyly sot otyrysyn keiinge qaldyrý týraly ótinish tastaǵan", - deidi Aidos Meldehannyń advokaty Jan Kúnserkin Orda.kz-ke.
Aikórkemniń ákesi Aidos Meldehan Almatyǵa densaýlyq jaǵdaiyna bailanysty ushyp ketýine týra kelgen. Qazir ol aýrýhanada jatyr. Ol advokattar dálel retinde ustap otyrǵan videony taýyp alǵan.
Videoda sur shashty er adam basqa adamǵa qarai iilip tur. Arman Jumannyń tarapy osylaisha Aidos Meldehandy terrorist ári Qańtar oqiǵasyna belsendi qatysqan adam retinde kórsetpek.
"Olar bul men ekenin dáleldeitin saraptama da júrgizip qoiǵan", - deidi Aidos Meldehan.
Onyń advokaty videodaǵy er adam Aidos Meldehan emes ekenin aitty.
"Birinshiden, videodaǵy er adam Aidos Meldehanǵa múldem uqsamaidy. Ekinshiden, videodaǵy adam basqa adamnyń júrek qaǵysyn kásibi deńgeide tekserip jatyr. Ol meditsina qyzmetkeri bolýy múmkin. Úshinshiden, videodaǵy adamnyń shashy aǵaryp ketken. Al Aidos Meldehannyń shashy qańtar oqiǵasynan keiin, qyzy mert bolǵannan keiin aǵara bastaǵan", - deidi advokat.
Aita keteiik, tórt jasar Aikórkem Meldehan 2022 jyly 6 qańtarda qaza tapty. Aikórkem, aǵasy jáne ápkesi otyrǵan kólikke oq jaýdyrylǵan. Oq Aikórkemniń basyna tigen, al aǵasy men ápkesi jaraqattar alǵan edi.
