Mysyr, Latviia, Meksika jáne Reseige kirýdiń jańartylǵan sharttary jariialandy, dep habarlaidy Dalanews.kz.
Latviia Respýblikasy
Latviia Respýblikasy Syrtqy ister ministrliginiń resmi aqparatyna súiensek, 2025 jylǵy 1 qyrkúiekten bastap Latviiaǵa kirýdiń jańa tártibi kúshine endi. Latviiada turýǵa yqtiiarhaty nemese ulttyq vizasy joq Qazaqstan azamattary Latviiaǵa kelýden keminde 48 saǵat buryn eta.gov.lv portaly arqyly ótinim berýge mindetti.
Ótinimde sapardyń maqsaty, merzimi men orny, baǵyty, bailanys derekteri, sondai-aq, ótinish berýshi men onyń jaqyn týystarynyń memlekettik nemese kúshtik qurylymdarda qyzmet atqarǵany týraly málimetter kórsetiledi.
Aqparat berilmegen nemese jalǵan málimet usynylǵan jaǵdaida 2 000 eýroǵa deiin aiyppul salynady. Diplomattar men diplomatiialyq ókildikterge qysqa merzimdi qyzmettik saparmen baratyn tulǵalar bul erejeden bosatylady. Málimet jiberilgennen keiin júie rastaý týraly aqparatty elektron poshtaǵa joldaidy.
Mysyr Arab Respýblikasy
Mysyr Arab Respýblikasynyń Astanadaǵy Elshiliginiń resmi aqparatyna sáikes 2025 jylǵy 1 qazannan bastap Qazaqstan azamattaryna qatysty vizalyq rejimge engizilgen jańa talaptar kúshine engen.
Jańa tártipke sáikes 21 jasqa tolmaǵan qazaqstandyqtar ata-anasynyń bireýiniń (ákesi nemese anasy) birge júrýinsiz Mysyr aýmaǵyna kire almaidy; 21 jasqa tolǵan azamattar Mysyrǵa týristik saparmen barǵanda sapar tek Sharm ash-Sheih aimaǵymen shektelip, 15 kúnnen aspaityn bolsa, vizany Sharm ash-Sheih halyqaralyq áýejaiynda rásimdei alady; Kair, Hýrgada nemese Mysyrdyń basqa qalalaryna barýdy josparlaǵan azamattar sapar aldynda Qazaqstandaǵy Mysyr Elshiliginen viza alýǵa tiis.
Meksika
Meksika Úkimetiniń resmi portalynda jariialanǵan Ulttyq kóshi-qon institýtynyń aqparatyna sáikes Qazaqstan azamattarynda AQSh, Kanada, Ulybritaniia, Japoniia nemese Shengen aimaǵyna múshe elderdiń jaramdy kóp mártelik vizasy bolsa, olar Meksikaǵa meksikalyq vizasyz kire alady.
Bul jaǵdaida týrizm, tranzit nemese tabys ákelmeitin iskerlik saparlar maqsatynda elge 180 kúnge deiin kirýge ruqsat beriledi. Viza sapardyń barlyq merziminde jaramdy bolýǵa tiis.
Eger mundai vizalar bolmasa, azamattar meksikalyq vizany aldyn ala konsýldyqtan alýy qajet.
Resei Federatsiiasy
1996 jylǵy 15 tamyzdaǵy № 114-FZ "Resei Federatsiiasynan shyǵý jáne Resei Federatsiiasyna kirý tártibi týraly" jáne 2008 jylǵy 3 jeltoqsandaǵy № 242-FZ "Resei Federatsiiasynda memlekettik genomdyq tirkeý týraly" Federaldyq zańdaryna sáikes sheteldik azamattar men azamattyǵy joq adamdar úshin Resei Federatsiiasyna kirý jáne shyǵý erejeleri men sharttaryn synaqtan ótkizý jónindegi eksperiment engizilip jatyr.
Eksperiment eki kezeńnen turady:
Birinshi kezeń: 2024 jylǵy jeltoqsannan bastap 2026 jylǵy 30 maýsymǵa deiin Máskeý áýejailarynda (Sheremetevo, Domodedovo, Vnýkovo, Jýkovskii), sondai-aq, Orynbor oblysyndaǵy "Mashtakovo" avtomobil ótkizý pýnktinde ótkiziledi. Bul kezeńde sheteldik azamattardyń biometriialyq derekteri jinalady.
Ekinshi kezeń: 2025 jylǵy 30 maýsymnan bastap 2026 jylǵy 30 maýsymǵa deiin Resei Federatsiiasynyń barlyq ótkizý pýnktinde qoldanylady. Vizasyz rejimmen kiretin sheteldik azamattar saparǵa shyǵýdan keminde 72 saǵat buryn (shuǵyl jaǵdailarda 4 saǵat buryn) ruID qosymshasy arqyly kirý jáne elde bolý maqsatyn kórsetýge tiis.
Qazir ruID qosymshasy arqyly aqparat joldaý erikti sipatta. QR azamattary ótinish bermei-aq Reseige kire alady.
