Ǵaryshqa ushýdy kópten beri armandap júrgen Aıdyn Aıymbetov aqyry Qazaqstannan shyqqan úshinshi ǵaryshker degen ataqqa ıe bolatyn boldy.
Reseıdiń ǵaryshkerlerdi daıarlaý ortalyǵynyń vedomstvoaralyq komısıasy Aıdyn Aıymbetovty brıtandyq ánshi Sara Braıtmannyń ornyna Halyqaralyq ǵarysh stansasyna ushýǵa qatysýshy retinde bekitti. Vedomstvoaralyq komısıanyń sheshimimen A.Aıymbetov HǴS-yna qysqa merzimdik ekspedısıasynyń quramyna engizildi. Onyń dýbleri bolyp reseılik ǵaryshker Sergeı Prokopev taǵaıyndalǵan. Buǵan deıin «Rosǵarysh» basshysy Igor Komarov HǴS-na ushýdan bas tartqan Braıtmannyń ornyna ushatyn adam taıaý ýaqytta anyqtalatynyn habarlaǵan edi. Sol kezde A. Aıymbetov pen kásipker Fedor Galchevtan basqa, «Soıýz TMA-18M» kemesinde brıtandyq ánshiniń ornyna ushý tájirıbesi bolmaǵan Prokopev úmitkerlerdiń biri bolǵan-dy. Nátıjesinde tańdaý A.Aıymbetovke tústi.
«Soıýz TMA-18M» ǵarysh kemesi 1 qyrkúıekte Baıqońyr ǵarysh aılaǵynan kókke samǵaıtyn bolady. A.Aıymbetovpen bir ekıpajda reseılik ǵaryshker Sergeı Volkov pen eýropalyq astronavt Andreas Mogensen ushady.
