Astana qalalyq sotyna turmystyq zorlyq-zombylyq isi boiynsha sottalǵan azamattyń apelliatsiialyq shaǵymy kelip tústi. Bul týraly jábirlenýshiniń advokaty Janna Muhamadi Facebook paraqshasynda jazdy, dep habarlaidy Dalanews.kz.
Onyń aitýynsha, eki balanyń anasy, dáriger Altynai Nursoltanova burynǵy kúieýi Áset Aiýpovtyń soqqysynan aýyr jaraqat alyp, múgedek bolyp qalǵan. Oqiǵa 2022 jyldyń naýryzynda bolǵan.
"Sol túni birneshe minýt ishinde ol Altynaidy múgedek qylǵan. Onyń beti birjola buzyldy. Altynai eńbekke jaramsyz bolyp, múgedek bolyp qaldy, kórý qabiletinen aiyryldy. Bet, muryn jáne kóz súiekteri synǵan", – dep jazdy qorǵaýshy.
Meditsinalyq qorytyndyǵa sáikes, jábirlenýshi basynan aýyr jaraqat alyp, miy shaiqalǵan. Saraptama bul jaǵdaidy aýyr dene jaraqaty dep baǵalaǵan.
Sot Aiýpovty 6 jylǵa bas bostandyǵynan aiyrdy. Biraq, advokattyń aitýynsha, ol qazir jazasyn jeńildetý, shartty túrde bosaý nemese túrme jaǵdaiyn jumsartý týraly ótinishterin belsendi túrde berip jatyr.
"Bir tamshy da ókinish joq!", – deidi Janna Muhamadi.
Qorǵaýshynyń sózine qaraǵanda, sottalǵan adamnyń týystary – ákesi men aǵasy jábirlenýshiniń sońynan qalmai, mazasyn alǵan. Osyǵan bailanysty olarǵa qorǵaý nusqamasy berilgen.
2024 jyldyń qazan aiynda Altynai Ońtústik Koreiada 8 saǵatqa sozylǵan tórtinshi qalpyna keltirý otasyn jasatqan. Alda taǵy birneshe operatsiia josparlanǵan, onyń ishinde kórý qabiletin qalpyna keltirý de bar. Áiel burynǵy kúieýinen emdelýge ketken shyǵyndy óteýdi sot arqyly talap etken. Sot onyń talabyn ishinara qanaǵattandyrǵan.
Alaida, Janna Muhamadidiń jazýynsha, Aiýpov bul sheshimmen kelispei, apelliatsiiaǵa shaǵym túsirgen. Shaǵymynda ol burynǵy áieli "plastikalyq otalar" úshin aqsha óndirýge tyrysyp jatyr dep kórsetken.
"Bul qandai arsyzdyq? Altynai áli 30-ǵa endi kelgen. Eger ony soqqyǵa jyǵýdy jón kórgen kúieýi bolmaǵanda, oǵan eshqandai operatsiia qajet bolmas edi", – dep jazdy advokat.
Janna Muhamadi qalalyq sottyń burynǵy sheshimdi ózgerissiz qaldyryp, klientiniń operatsiiaǵa daiyndalý úshin ótemaqyny tolyq alýyna úmit artatynyn jetkizdi.
