استانا قالالىق سوتىنا تۇرمىستىق زورلىق-زومبىلىق ءىسى بويىنشا سوتتالعان ازاماتتىڭ اپەللياسيالىق شاعىمى كەلىپ ءتۇستى. بۇل تۋرالى جابىرلەنۋشىنىڭ ادۆوكاتى جاننا مۇحامادي Facebook پاراقشاسىندا جازدى، دەپ حابارلايدى Dalanews.kz.
ونىڭ ايتۋىنشا، ەكى بالانىڭ اناسى، دارىگەر التىناي نۇرسولتانوۆا بۇرىنعى كۇيەۋى اسەت ايۋپوۆتىڭ سوققىسىنان اۋىر جاراقات الىپ، مۇگەدەك بولىپ قالعان. وقيعا 2022 جىلدىڭ ناۋرىزىندا بولعان.
"سول ءتۇنى بىرنەشە مينۋت ىشىندە ول التىنايدى مۇگەدەك قىلعان. ونىڭ بەتى ءبىرجولا بۇزىلدى. التىناي ەڭبەككە جارامسىز بولىپ، مۇگەدەك بولىپ قالدى، كورۋ قابىلەتىنەن ايىرىلدى. بەت، مۇرىن جانە كوز سۇيەكتەرى سىنعان"، – دەپ جازدى قورعاۋشى.
مەديسينالىق قورىتىندىعا سايكەس، جابىرلەنۋشى باسىنان اۋىر جاراقات الىپ، ميى شايقالعان. ساراپتاما بۇل جاعدايدى اۋىر دەنە جاراقاتى دەپ باعالاعان.
سوت ايۋپوۆتى 6 جىلعا باس بوستاندىعىنان ايىردى. ءبىراق، ادۆوكاتتىڭ ايتۋىنشا، ول ءقازىر جازاسىن جەڭىلدەتۋ، شارتتى تۇردە بوساۋ نەمەسە تۇرمە جاعدايىن جۇمسارتۋ تۋرالى وتىنىشتەرىن بەلسەندى تۇردە بەرىپ جاتىر.
"ءبىر تامشى دا وكىنىش جوق!"، – دەيدى جاننا مۇحامادي.
قورعاۋشىنىڭ سوزىنە قاراعاندا، سوتتالعان ادامنىڭ تۋىستارى – اكەسى مەن اعاسى جابىرلەنۋشىنىڭ سوڭىنان قالماي، مازاسىن العان. وسىعان بايلانىستى ولارعا قورعاۋ نۇسقاماسى بەرىلگەن.
2024 جىلدىڭ قازان ايىندا التىناي وڭتۇستىك كورەيادا 8 ساعاتقا سوزىلعان ءتورتىنشى قالپىنا كەلتىرۋ وتاسىن جاساتقان. الدا تاعى بىرنەشە وپەراسيا جوسپارلانعان، ونىڭ ىشىندە كورۋ قابىلەتىن قالپىنا كەلتىرۋ دە بار. ايەل بۇرىنعى كۇيەۋىنەن ەمدەلۋگە كەتكەن شىعىندى وتەۋدى سوت ارقىلى تالاپ ەتكەن. سوت ونىڭ تالابىن ءىشىنارا قاناعاتتاندىرعان.
الايدا، جاننا ءمۇحاماديدىڭ جازۋىنشا، ايۋپوۆ بۇل شەشىممەن كەلىسپەي، اپەللياسياعا شاعىم تۇسىرگەن. شاعىمىندا ول بۇرىنعى ايەلى "پلاستيكالىق وتالار" ءۇشىن اقشا وندىرۋگە تىرىسىپ جاتىر دەپ كورسەتكەن.
"بۇل قانداي ارسىزدىق؟ التىناي ءالى 30-عا ەندى كەلگەن. ەگەر ونى سوققىعا جىعۋدى ءجون كورگەن كۇيەۋى بولماعاندا، وعان ەشقانداي وپەراسيا قاجەت بولماس ەدى"، – دەپ جازدى ادۆوكات.
جاننا مۇحامادي قالالىق سوتتىڭ بۇرىنعى شەشىمدى وزگەرىسسىز قالدىرىپ، كليەنتىنىڭ وپەراسياعا دايىندالۋ ءۇشىن وتەماقىنى تولىق الۋىنا ءۇمىت ارتاتىنىن جەتكىزدى.
