QR Prezidenti janyndaǵy áiel isteri jáne otbasylyq demografiialyq saiasat jónindegi ulttyq komissiiasynyń qatysýymen ótken jiynda genderlik saiasat boiynsha áielderdiń qoǵamdaǵy, saiasattaǵy jáne sheshimder qabyldaý deńgeiindegi róli sóz bolyp, otbasynda zorlyq-zombylyq kórgen áielderdiń, jalǵyz basty jáne múgedek balalary bar analardyń quqyqtaryn qorǵaý siiaqty mańyzdy máselelerdiń sebepteri men sheshý joldary qarastyryldy.
«Elimizde áielderdiń quqyqtaryn júzege asyrýǵa kedergi bolatyn qaýip-qaterler týraly qoǵamnyń basym bóligin tarta otyryp, memlekettik organdar ókilderiniń qatysýymen beiresmi, ashyq pikirtalas alańdarynda, forýmdarda barynsha keń talqylaý kerek», deidi Shyǵarmashylyq áielder bastamasy ligasynyń prezidenti Asiia Hairýlina.
Elimizde adam quqyqtaryn qorǵaý boiynsha jumys jasap jatqan «Soros-Qazaqstan» qory áielder quqyn qorǵaý boiynsha arnaiy joba júrgizýde. Oǵan «Áieldi aiala» aqparattyq naýqany men «Kiimdi kináláma» jáne «Uiat» atty kórmelerdi jatqyzýǵa bolady. «Ókinishke qarai qazirgi tańda áielderdiń quqyǵyn taptap, zorlyq-zombylyqqa jol berý kóbeiip barady. Biz osyǵan jekelegen tulǵa retinde emes, qoǵam bolyp jumylyp tosqaýyl qoiýdy kózdep otyrmyz.
Osyǵan bailanysty 8 naýryz halyqaralyq áielder kúni aqparattyq naýqan da bastalǵan bolatyn. 10 jeltoqsanda Halyqaralyq adam quqyqtary kúni aiaqtalatyn naýqanǵa óner juldyzdary men qoǵam qairatkerleriniń belsendi ún qosýy bizdi qýantty. Áielderdiń quqyqtary boiynsha jasalatyn jumystarymyz bolashaqta da jalǵasa beredi», dedi «Soros-Qazaqstan» qorynyń baǵdarlamalar direktory Aida Aidarqulova. Qazaq qoǵamyndaǵy áielderdiń róli, qoǵamdyq pikirdiń qalyptasýyna áielderdiń áseri týraly tanymal jýrnalist Láila Sultanqyzy toqtalsa, jalǵyzbasty analardyń máselesin Aina Dosmahambetqyzy kóterdi.
Jalǵyz basty analarǵa kómek óte az ekenin aitqan bloger A.Dosmahambetqyzy aliment máselesin sheshý boiynsha arnaiy qor qurý degendi aitty.
«Qoǵam kóp jaǵdaida kináni áieldiń moinyna ilip qoiady. Bizde ajyrassa da, kúieýi qol kóterse de, múgedek bala týsa da áiel kináli degen túsinik qalyptasqan. Sondyqtan kóp jaǵdaida áielder zorlyqqa shydaidy», deidi ol. QR Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń sarapshylar keńesiniń hatshysy Kamal Álpeiisova da barlyq jaýapkershilikti áielge artýdan aýlaq bolyp, ul tárbiesin myqtap qolǵa alý kerektigin aitady.
«Bul qoǵamnyń jandy máseleleriniń biri. Áýelde er balany bolashaqta áke atanyp qorǵaýshy, súieý bolatynyn kishkentai kezinen miyna sińirip ósirý bizde óte az. Men mańaiymdaǵy jastarmen sóilesip, qalyńdyqtaryna qandai talap qoiatynyn tyńdaimyn. Al ol talapqa sai kelmese ajyrasyp kete salamyn deitin bozbalalar óte kóp. «Teńizdiń dámin bir tamshy sýdan bilýge bolady». Osynyń ózi bizdiń er balalarda otbasyn qurýǵa degen jaýapkershiliktiń az ekenin kórsetedi. Qyzdy, áieldi, jas kelindi tárbieleý boiynsha jumys jasaityn uiymdar bar, qanshama konkýrstar uiymdastyrylady.
Biraq uldy tárbieleý degendi estimeppin. Qyzdy tárbieli qylyp, tárbiesiz jigitke berýdiń sońy jaqsylyqqa ákelip jatqan joq. Bul er men áielge jik salý emes. Máseleniń sebebin taldaý kerek. Mektepke ul tárbiesi týraly baǵdarlama kirgizý kerek», degen Kamal Ábilqasymqyzy qyzdyń ǵana emes, uldyń da joǵary oqý oryndarynda oqýyna basa nazar aýdarý kerektigin aitty.
Konferentsiia jumysyna Qazaqstan Respýblikasy Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiia tóraǵasynyń orynbasary Lázzat Sýleimen, Ádilet vitse-ministri Elvira Ázimova, úkimettik emes uiym ókilderi, quqyq qorǵaýshylar, jýrnalister men qoǵam qairatkerleri qatysty.
Konferentsiianyń qorytyndysy boiynsha ázirlengen mańyzdy usynystar tek memlekettik organdarǵa ǵana emes, azamattyq qoǵam múshelerine jáne qoǵamdyq uiymdarǵa usynylmaq. Maigúl SULTAN «Egemen Qazaqstan»
Derekkóz: egemen.kz
