Temirjolshylar kúni qarsańynda 95 jyldyq tarıhy bar Aıagóz lokomotıv paıdalaný deposynda ardager temirjolshylarǵa arnalǵan eskertkish taqta ashyldy, - dep habarlaıdy Dalanews.kz "Qazaqstan temirjolshysy" saıtyna siltep.
Merekelik is-sharaǵa Aıagóz qalasynyń ákimdigi, depo ujymy men basshylyǵy, temirjol salasynyń ardagerleri, Astana, Almaty, Semeı qalalarynan arnaıy shaqyrylǵan qurmetti qonaqtar qatysty. Jıyndy ashqan jergilikti temirjol ardageri Serik Akıshev eskertkish taqta ashý ıdeıasy men onyń júzege asyrylýyna jáne ardagerlerdiń qysqasha ómirbaıany men eńbek joldaryna toqtalyp ótti.
Abaı oblysyna belgili qoǵam qaıratkeri Shymbolat Orazbaev (1934-2021) – Aıagóz deposynda 1959-1970 jyldary qarapaıym jumysshydan depo bastyǵyna deıin kóterilgen eńbek ardageri. Keıinnen Semeı oblystyq partıa komıtetiniń bólim meńgerýshisi, Semeıdiń Kalının aýdandyq partıa komıtetiniń birinshi hatshysy, Semeı qalasy atqarý komıtetiniń tóraǵasy, Semeı oblystyq partıa komıtetiniń hatshysy, oblystyq kásipodaq uıymynyń tóraǵasy, Almaty temirjol basqarmasynyń qyzmetkeri sıaqty jaýapty laýazymdardy atqarǵan elge belgili azamat. Eren eńbegi baǵalanyp, «Eńbek Qyzyl Tý», «Qurmet belgisi» ordenderimen marapattalǵan, «Semeı qalasynyń qurmetti azamaty» ataǵynyń ıegeri.
Aıagóz deposynyń irgetasyn qalaǵan, Túrksibti salýǵa qatysqan ardager, «Lenın» ordeniniń ıegeri Jaqsybek Aımaǵambetov (1913-1988) temir jolda 50 jyl eńbek etken. Ardager Jumaǵalı Baltashev (1935-2012) «Halyqtar dostyǵy» ordenimen, birneshe medaldarmen marapattalǵan, Qurmetti temirjolshy, 43 jyl eńbek etken ardager. Qysqasy, qaı-qaısysy da mundaı qurmetke ábden laıyq tulǵalar.
Jıynda sóz alǵan Aıagóz qalasynyń ákimi Asqar Erlanov, Aıagóz temirjol toraby ardagerler keńesiniń tóraǵasy Tóken Kópbaev, Astanadan kelgen ardager-temirjolshy, kezinde osy depony basqarǵan Aspan Qajyǵulov ótken jyldardan estelikter shertip, atalǵan ardagerlerdiń temirjol salasyna sińirgen eńbekteri týraly sóz etti.
Aımaq temirjolynyń tarıhynda Aıagóz lokomotıv paıdalaný deposynyń orny aıryqsha ekenin jetkizip, osynaý kásibı mamandar ustahanasynan shyńdalyp shyqqan dańqty temirjolshylardyń ómiri men elge sińirgen eńbekteri búgingi urpaqqa ónege kózi ekenin jetkizdi. Urpaqtar sabaqtastyǵy jalǵasýda.
Jalpy Aıagóz toraby kezinde kadrlar ustahanasy atalyp, Qazaqstan temir jolyna bilikti mamandar daıarlaýdyń mektebi bolǵany sóz boldy.
Eskertkish taqtany ornatýǵa jáne saltanatty jıyndy joǵary deńgeıde ótkizýge tikeleı atsalysqan depo ujymy men ardagerlerge, depo bastyǵy Almas Janatqalıev pen bas ınjeneri Asqar Sabyrbaevqa jınalǵan qaýym zor alǵys aıtty. Ásirese eskertkish taqtasy ashylatyn ardagerlerdiń týystary Shákárim ýnıversıtetiniń profesory Qumarbek Amırhanov, Ómirbek Aımaǵambetov, Meıramǵazy Baltashev is-sharany uıymdastyrýshylarǵa shyn júrekten alǵystaryn bildirip, jastarǵa úlgi-tárbıe beretin osyndaı jıyndardy aldaǵy ýaqytta da jalǵastyra berýge usynys jasady.
Sol kúni eskertkish taqtalary ashylǵan ardagerler rýhtaryna baǵyshtalyp as berildi.
