تەمىرجولشىلار كۇنى قارساڭىندا 95 جىلدىق تاريحى بار اياگوز لوكوموتيۆ پايدالانۋ دەپوسىندا ارداگەر تەمىرجولشىلارعا ارنالعان ەسكەرتكىش تاقتا اشىلدى، - دەپ حابارلايدى Dalanews.kz "قازاقستان تەمىرجولشىسى" سايتىنا سىلتەپ.
مەرەكەلىك ءىس-شاراعا اياگوز قالاسىنىڭ اكىمدىگى، دەپو ۇجىمى مەن باسشىلىعى، تەمىرجول سالاسىنىڭ ارداگەرلەرى، استانا، الماتى، سەمەي قالالارىنان ارنايى شاقىرىلعان قۇرمەتتى قوناقتار قاتىستى. جيىندى اشقان جەرگىلىكتى تەمىرجول ارداگەرى سەرىك اكيشيەۆ ەسكەرتكىش تاقتا اشۋ يدەياسى مەن ونىڭ جۇزەگە اسىرىلۋىنا جانە ارداگەرلەردىڭ قىسقاشا ءومىربايانى مەن ەڭبەك جولدارىنا توقتالىپ ءوتتى.
اباي وبلىسىنا بەلگىلى قوعام قايراتكەرى شىمبولات ورازبايەۆ (1934-2021) – اياگوز دەپوسىندا 1959-1970 جىلدارى قاراپايىم جۇمىسشىدان دەپو باستىعىنا دەيىن كوتەرىلگەن ەڭبەك ارداگەرى. كەيىننەن سەمەي وبلىستىق پارتيا كوميتەتىنىڭ ءبولىم مەڭگەرۋشىسى، سەمەيدىڭ كالينين اۋداندىق پارتيا كوميتەتىنىڭ ءبىرىنشى حاتشىسى، سەمەي قالاسى اتقارۋ كوميتەتىنىڭ ءتوراعاسى، سەمەي وبلىستىق پارتيا كوميتەتىنىڭ حاتشىسى، وبلىستىق كاسىپوداق ۇيىمىنىڭ ءتوراعاسى، الماتى تەمىرجول باسقارماسىنىڭ قىزمەتكەرى سياقتى جاۋاپتى لاۋازىمداردى اتقارعان ەلگە بەلگىلى ازامات. ەرەن ەڭبەگى باعالانىپ، «ەڭبەك قىزىل تۋ»، «قۇرمەت بەلگىسى» وردەندەرىمەن ماراپاتتالعان، «سەمەي قالاسىنىڭ قۇرمەتتى ازاماتى» اتاعىنىڭ يەگەرى.
اياگوز دەپوسىنىڭ ىرگەتاسىن قالاعان، تۇركسىبتى سالۋعا قاتىسقان ارداگەر، «لەنين» وردەنىنىڭ يەگەرى جاقسىبەك ايماعامبەتوۆ (1913-1988) تەمىر جولدا 50 جىل ەڭبەك ەتكەن. ارداگەر جۇماعالي بالتاشيەۆ (1935-2012) «حالىقتار دوستىعى» وردەنىمەن، بىرنەشە مەدالدارمەن ماراپاتتالعان، قۇرمەتتى تەمىرجولشى، 43 جىل ەڭبەك ەتكەن ارداگەر. قىسقاسى، قاي-قايسىسى دا مۇنداي قۇرمەتكە ابدەن لايىق تۇلعالار.
جيىندا ءسوز العان اياگوز قالاسىنىڭ اكىمى اسقار ەرلانوۆ، اياگوز تەمىرجول تورابى ارداگەرلەر كەڭەسىنىڭ ءتوراعاسى توكەن كوپبايەۆ، استانادان كەلگەن ارداگەر-تەمىرجولشى، كەزىندە وسى دەپونى باسقارعان اسپان قاجىعۇلوۆ وتكەن جىلداردان ەستەلىكتەر شەرتىپ، اتالعان ارداگەرلەردىڭ تەمىرجول سالاسىنا سىڭىرگەن ەڭبەكتەرى تۋرالى ءسوز ەتتى.
ايماق تەمىرجولىنىڭ تاريحىندا اياگوز لوكوموتيۆ پايدالانۋ دەپوسىنىڭ ورنى ايرىقشا ەكەنىن جەتكىزىپ، وسىناۋ كاسىبي ماماندار ۇستاحاناسىنان شىڭدالىپ شىققان داڭقتى تەمىرجولشىلاردىڭ ءومىرى مەن ەلگە سىڭىرگەن ەڭبەكتەرى بۇگىنگى ۇرپاققا ونەگە كوزى ەكەنىن جەتكىزدى. ۇرپاقتار ساباقتاستىعى جالعاسۋدا.
جالپى اياگوز تورابى كەزىندە كادرلار ۇستاحاناسى اتالىپ، قازاقستان تەمىر جولىنا بىلىكتى ماماندار دايارلاۋدىڭ مەكتەبى بولعانى ءسوز بولدى.
ەسكەرتكىش تاقتانى ورناتۋعا جانە سالتاناتتى جيىندى جوعارى دەڭگەيدە وتكىزۋگە تىكەلەي اتسالىسقان دەپو ۇجىمى مەن ارداگەرلەرگە، دەپو باستىعى الماس جاناتقالييەۆ پەن باس ينجەنەرى اسقار سابىربايەۆقا جينالعان قاۋىم زور العىس ايتتى. اسىرەسە ەسكەرتكىش تاقتاسى اشىلاتىن ارداگەرلەردىڭ تۋىستارى شاكارىم ۋنيۆەرسيتەتىنىڭ پروفەسسورى قۇماربەك اميرحانوۆ، ومىربەك ايماعامبەتوۆ، مەيرامعازى بالتاشيەۆ ءىس-شارانى ۇيىمداستىرۋشىلارعا شىن جۇرەكتەن العىستارىن ءبىلدىرىپ، جاستارعا ۇلگى-تاربيە بەرەتىن وسىنداي جيىنداردى الداعى ۋاقىتتا دا جالعاستىرا بەرۋگە ۇسىنىس جاسادى.
سول كۇنى ەسكەرتكىش تاقتالارى اشىلعان ارداگەرلەر رۋحتارىنا باعىشتالىپ اس بەرىلدى.
