«Jol aktıvteriniń ulttyq sapa ortalyǵy» RMK Bas dırektory Zamır Saǵynovtyń aıtýynsha, ortalyq oqýshylar arasynda kásibı baǵdarlaý jumysyn júrgizip, jol jóndeýshi mamandyǵy týraly, osy kásiptiń artyqshylyqtary men keleshegi týraly mektep túlekterine tolyq aqparat berý sharalaryn bastaǵan.
Eger buryn aımaqtyq zerthanalar respýblıkalyq joldardyń sapasyn tekserip, onyń kemshilikterimen kúresse, qazir qurylǵan ortalyq barlyq jalpyǵa ortaq joldardy, sonyń ishinde jergilikti joldardy tutas qamtıdy.
Ortalyq álemdik deńgeıde qalyptasqan standarttardy keńinen engizýde.
– Osylaısha, meılinshe bilim ordalaryn kóp qamtý maqsatymen «1000 mektep» aksıasy qolǵa alyndy. Budan basqa, Jol aktıvteriniń ulttyq sapa ortalyǵy bolashaq avtojol salasy mamandaryn daıyndaıtyn, elimizdiń kolejderimen jáne JOO-larmen de belsendi jumystar júrgizedi. Bul shara aıasynda 715 mektep, 12 JOO, 17 kolej qamtyldy. Qazir ZOOM jáne Instagram tuǵyrnamasynda, onlaın-negizde bul sharalar toqtaýsyz jalǵasýda, – deıdi Zamır Saǵynov.
Munan ózge, stýdentterge aqy tólenetin praktıkadan ótýlerine múmkindik jasalǵan. Jaz boıy ortalyqta 45 stýdent atqarǵan eńbekterine qaraı aqysyn alyp, teorıalyq bilimderin naqty jumyspen ushtastyryp, tájirıbeden ótti.
Osyndaı naqty sharalar arqyly avtomobıl joldary salasynda bilikti maman tapshylyǵyn joıý jumystary bastaldy.
– Qazirgideı aqparattyq tehnologıalar men jappaı sıfrlandyrý zamanynda jastarǵa júkteler jaýapkershilik te zor. Sondyqtan, jastarymyz baǵyndyratyn jańa tehnologıalar joldyń sapasyn jaqsartýǵa, onyń jaǵdaıyn baqylaýǵa, ózgeristerdi kórýge, trafık aǵynyn basqarýǵa, sonymen qatar taldaý jasaýǵa múmkindik bermek, – deıdi Ortalyq basshysy.
Joldyń sapaly salynýy, muqıat jáne standarttarǵa saı jóndeýden ótkizilýi, túptiń túbinde – adam ómirin, ásirese sábılerdiń, mektep oqýshylarynyń ómirlerin saqtap qalýǵa ákeletinin esten shyǵarmaý qajet. Munyń bári halyqaralyq deńgeıde qabyldanǵan bıik talaptar, al olardy múltiksiz oryndaý – tek jolshylar paryzy ǵana emes, sol joldy paıdalanatyn avtomobıl júrgizýshileri men jaıaý júrginshilerdiń de mindeti.
