وتكەن جىلى قۇرىلعان «جول اكتيۆتەرىنىڭ ۇلتتىق ساپا ورتالىعى» رمك جول سالاسىنا قاتىستى پروبلەمالاردى زەردەلەپ، ولاردى شەشۋ باعىتتارىن ايقىندادى. بۇل ورتالىقتىڭ ماقساتى – جولداردى سالۋ، قايتا قۇرۋ، جوندەۋ جانە كۇتىپ-ۇستاۋ، سونداي-اق ماتەريالداردىڭ ساپاسىن ساراپتاۋ بولعاندىقتان، وسى جۇمىستاردى اتقارۋ ءۇشىن جان-جاقتى دايارلىقتان وتكەن ماماندار قاجەت. 

«جول اكتيۆتەرىنىڭ ۇلتتىق ساپا ورتالىعى» رمك باس ديرەكتورى زامير ساعىنوۆتىڭ ايتۋىنشا، ورتالىق  وقۋشىلار اراسىندا كاسىبي باعدارلاۋ جۇمىسىن جۇرگىزىپ، جول جوندەۋشى ماماندىعى تۋرالى، وسى كاسىپتىڭ ارتىقشىلىقتارى مەن كەلەشەگى تۋرالى مەكتەپ تۇلەكتەرىنە تولىق اقپارات بەرۋ شارالارىن باستاعان.

ەگەر بۇرىن ايماقتىق زەرتحانالار رەسپۋبليكالىق جولداردىڭ ساپاسىن تەكسەرىپ، ونىڭ كەمشىلىكتەرىمەن كۇرەسسە، ءقازىر قۇرىلعان ورتالىق بارلىق جالپىعا ورتاق جولداردى، سونىڭ ىشىندە جەرگىلىكتى جولداردى تۇتاس قامتيدى.

ورتالىق الەمدىك دەڭگەيدە قالىپتاسقان ستاندارتتاردى كەڭىنەن ەنگىزۋدە.

– وسىلايشا، مەيلىنشە ءبىلىم وردالارىن كوپ قامتۋ ماقساتىمەن «1000 مەكتەپ» اكسياسى قولعا الىندى. بۇدان باسقا، جول اكتيۆتەرىنىڭ ۇلتتىق ساپا ورتالىعى بولاشاق اۆتوجول سالاسى ماماندارىن دايىندايتىن، ەلىمىزدىڭ كوللەدجدەرىمەن جانە جوو-لارمەن دە بەلسەندى جۇمىستار جۇرگىزەدى. بۇل شارا اياسىندا 715 مەكتەپ، 12 جوو، 17 كوللەدج قامتىلدى. ءقازىر ZOOM جانە Instagram تۇعىرناماسىندا، ونلاين-نەگىزدە بۇل شارالار توقتاۋسىز جالعاسۋدا، – دەيدى زامير ساعىنوۆ.

مۇنان وزگە، ستۋدەنتتەرگە اقى تولەنەتىن پراكتيكادان وتۋلەرىنە مۇمكىندىك جاسالعان. جاز بويى ورتالىقتا 45 ستۋدەنت اتقارعان ەڭبەكتەرىنە قاراي اقىسىن الىپ، تەوريالىق بىلىمدەرىن ناقتى جۇمىسپەن ۇشتاستىرىپ، تاجىريبەدەن ءوتتى.

وسىنداي ناقتى شارالار ارقىلى اۆتوموبيل جولدارى سالاسىندا بىلىكتى مامان تاپشىلىعىن جويۋ جۇمىستارى باستالدى.

– قازىرگىدەي اقپاراتتىق تەحنولوگيالار مەن جاپپاي سيفرلاندىرۋ زامانىندا جاستارعا جۇكتەلەر جاۋاپكەرشىلىك تە زور. سوندىقتان، جاستارىمىز باعىندىراتىن جاڭا تەحنولوگيالار جولدىڭ ساپاسىن جاقسارتۋعا، ونىڭ جاعدايىن باقىلاۋعا، وزگەرىستەردى كورۋگە، ترافيك اعىنىن باسقارۋعا، سونىمەن قاتار تالداۋ جاساۋعا مۇمكىندىك بەرمەك، – دەيدى ورتالىق باسشىسى.

جولدىڭ ساپالى سالىنۋى، مۇقيات جانە ستاندارتتارعا ساي جوندەۋدەن وتكىزىلۋى، ءتۇپتىڭ تۇبىندە – ادام ءومىرىن، اسىرەسە سابيلەردىڭ، مەكتەپ وقۋشىلارىنىڭ ومىرلەرىن ساقتاپ قالۋعا اكەلەتىنىن ەستەن شىعارماۋ قاجەت. مۇنىڭ ءبارى حالىقارالىق دەڭگەيدە قابىلدانعان بيىك تالاپتار، ال ولاردى مۇلتىكسىز ورىنداۋ – تەك جولشىلار پارىزى عانا ەمەس، سول جولدى پايدالاناتىن اۆتوموبيل جۇرگىزۋشىلەرى مەن جاياۋ جۇرگىنشىلەردىڭ دە مىندەتى.