Almaty oblysyndaǵy Avat aýylynyń turǵyndary ekologiialyq jaǵdaiǵa bailanysty qaitadan dabyl qaǵýda. Aýyl halqynyń aitýynsha, eldi mekendegi ómir súrý jaǵdaiy jyldan-jylǵa qiyndap barady: bir jaǵynan karerden kóteriletin shań maza bermese, ekinshi jaǵynan qoqys poligondarynan taraityn tútin men jaǵymsyz iis turǵyndardy ábden tityqtatqan, dep habarlaidy dalanews.kz.
Aýyl turǵyndarynyń sózinshe, másele ásirese jaz mezgilinde ýshyǵa túsedi. Kún ystyqta úilerdiń terezesin ashýdyń ózi qiynǵa soǵady. Óitkeni kei kezderi qoqys qaldyqtary janyp, tútin men qolqany qabatyn iis búkil aýyldy basyp qalady.
Bul jaǵdaidyń búgin ǵana paida bolmaǵany da aitylyp otyr. Ashyq derekkózderdegi málimetterge súiensek, birneshe jyl buryn-aq Avat turǵyndary aýyl mańyndaǵy qoqys poligondaryn jabýdy talap etip, jii bolatyn órtter men tútinge qatysty shaǵymdaryn jariia túrde jetkizgen.
Sondai-aq resmi ekologiialyq qujattarda aýyldyń batys bóliginde ornalasqan «Avat» ken ornyndaǵy qum-qiyrshyq tas óndiretin karerdiń jumysy kórsetilgen.
Osyǵan bailanysty turǵyndar birneshe mańyzdy suraq kóterýde: nege jyldar boiy aitylyp kele jatqan másele áli kúnge deiin tolyq sheshilmegen? Aýa sapasyn kim baqylaidy? Poligondar men karerlerdiń ekologiialyq talaptardy saqtaýyn qandai organdar qadaǵalaidy? Eger qoqys zańsyz órtelse, oǵan kim jaýap beredi?
Turǵyndar Almaty oblysynyń ákimdigine, Ekologiia departamentine jáne tabiǵatty qorǵaý prokýratýrasyna naqty sharalar qabyldaýdy suraidy. Olardyń pikirinshe, aýaǵa taraityn lastaýshy kózderdi anyqtap, arnaiy tekseris júrgizip, aýa sapasyna ólsheýler jasalyp, poligondar men karerlerdiń qyzmeti ekologiialyq talaptarǵa sáikestigi turǵysynan tekserilýi qajet. Sonymen qatar tekserý nátijeleri halyqqa ashyq jariialanýy tiis.
Aýyl turǵyndary Memleket basshysynan da óńirdegi ekologiialyq ahýalǵa nazar aýdarýdy suraidy. Olardyń aitýynsha, halyq karer shańy men qoqys tútininiń ortasynda ómir súrýge májbúr bolmaýy kerek.
TJD ne deidi?
Almaty oblystyq Tótenshe jaǵdailar departamentiniń baspasóz qyzmeti atalǵan jaǵdaiǵa qatysty túsinikteme berdi.
Vedomstvo málimetinshe, Talǵar aýdanyndaǵy Aqtas aýyly mańynda ornalasqan karer aýmaǵynda qoqys órtengen.
«Órt tolyqtai sóndirildi. Oqiǵa ornynda TJD kúshteri, jergilikti atqarýshy organdardyń ókilderi jáne aýmaq iesiniń ókilderi jumys istedi. Zardap shekkender joq. Anyqtalǵan zańbuzýshylyq faktisi boiynsha jaýapty tulǵa ákimshilik jaýapkershilikke tartyldy», – dep habarlady vedomstvo.
Sondai-aq TJD turǵyndarǵa órt qaýipsizdigi erejelerin qatań saqtaýdy eskertti.
