Eki apta buryn ǵana tájik-qyrǵyz shekarasynda qarýly qaqtyǵys bolyp, sonyń saldarynan bir shekarashy aýrýhanada qaitys bolǵan. Bilik aýyzashar sekildi birlesken sharalar ótkizý arqyly aýyzbirshilikti arttyrýǵa bolady dep esepteidi.
Degenmen turǵyndardyń keibiri sheneýnikter shekaradaǵy daýdy sheshýge emes, «dostyq palaýyn» uiymdastyrýǵa ǵana jaraidy dep synady.
Shekaranyń eki jaǵyndaǵy halyqtyń birlesken aýyzashary 27 sáýirde keshke Tájikstandaǵy Bobojon Ǵafýrov aýdany Ovchi-Kalacha aýylynda ótti.
Oǵan jergilikti turǵyndar men Qyrǵyzstannyń Leilek aýdanynyń aqsaqaldary, belsendileri jinaldy.
Bobojon Ǵafýrov aýdany tóraǵasynyń orynbasary Dilorom Tursunzodanyń aitýynsha, ujym bolyp aýyzashar uiymdastyrý bastamasyn tájik jaǵy kótergen. Oǵan jergilikti sheneýnikter men áskeriler de kelgen.
26 sáýirde Tájikstandaǵy Chorkýh aýylynda da birlesken aýyzashar boldy. Oǵan tájiktiń Isfara qalasy men qyrǵyzdyń Batken aimaǵy turǵyndary keldi. Dál osyndai aýyzashardy endi qyrǵyz jaǵy uiymdastyrady.
Dostyq kezdesýler men jiyndar shekaralas aýdandarda buǵan deiin de ótken, biraq odan shekaradaǵy atystar men janjaldar toqtamady.
Sarapshylardyń pikirinshe, shekarany demarkatsiialaý máselesi tolyq sheshilmeiinshe, Tájikstan men Qyrǵyzstan arasyndaǵy shekaraǵa qatysty daý toqtamaidy.
