ەكٸ اپتا بۇرىن عانا تەجٸك-قىرعىز شەكاراسىندا قارۋلى قاقتىعىس بولىپ, سونىڭ سالدارىنان بٸر شەكاراشى اۋرۋحانادا قايتىس بولعان. بيلٸك اۋىزاشار سەكٸلدٸ بٸرلەسكەن شارالار ٶتكٸزۋ ارقىلى اۋىزبٸرشٸلٸكتٸ ارتتىرۋعا بولادى دەپ ەسەپتەيدٸ.
دەگەنمەن تۇرعىنداردىڭ كەيبٸرٸ شەنەۋنٸكتەر شەكاراداعى داۋدى شەشۋگە ەمەس, «دوستىق پالاۋىن» ۇيىمداستىرۋعا عانا جارايدى دەپ سىنادى.
شەكارانىڭ ەكٸ جاعىنداعى حالىقتىڭ بٸرلەسكەن اۋىزاشارى 27 سەۋٸردە كەشكە تەجٸكستانداعى بوبوجون عافۋروۆ اۋدانى وۆچي-كالاچا اۋىلىندا ٶتتٸ.
وعان جەرگٸلٸكتٸ تۇرعىندار مەن قىرعىزستاننىڭ لەيلەك اۋدانىنىڭ اقساقالدارى, بەلسەندٸلەرٸ جينالدى.
بوبوجون عافۋروۆ اۋدانى تٶراعاسىنىڭ ورىنباسارى ديلوروم تۇرسۇنزودانىڭ ايتۋىنشا, ۇجىم بولىپ اۋىزاشار ۇيىمداستىرۋ باستاماسىن تەجٸك جاعى كٶتەرگەن. وعان جەرگٸلٸكتٸ شەنەۋنٸكتەر مەن ەسكەريلەر دە كەلگەن.
26 سەۋٸردە تەجٸكستانداعى چوركۋح اۋىلىندا دا بٸرلەسكەن اۋىزاشار بولدى. وعان تەجٸكتٸڭ يسفارا قالاسى مەن قىرعىزدىڭ باتكەن ايماعى تۇرعىندارى كەلدٸ. دەل وسىنداي اۋىزاشاردى ەندٸ قىرعىز جاعى ۇيىمداستىرادى.
دوستىق كەزدەسۋلەر مەن جيىندار شەكارالاس اۋدانداردا بۇعان دەيٸن دە ٶتكەن, بٸراق ودان شەكاراداعى اتىستار مەن جانجالدار توقتامادى.
ساراپشىلاردىڭ پٸكٸرٸنشە, شەكارانى دەماركاتسييالاۋ مەسەلەسٸ تولىق شەشٸلمەيٸنشە, تەجٸكستان مەن قىرعىزستان اراسىنداعى شەكاراعا قاتىستى داۋ توقتامايدى.
