Aýyl sharýashylyǵy ministrliginiń burynǵy qyzmetkeri Baýyrjan Aiymbetovke qatysty qylmystyq is boiynsha urlanǵan qarjy kólemi 3,3 mlrd teńgege jetti. Bul týraly Qarjy monitoringi agenttigi tóraǵasynyń orynbasary Qairat Bijanov málimdedi, dep habarlaidy Dalanews.kz.
Sondai-aq iste burynǵy máslihat depýtaty Beket Ábishev te kúdikti retinde tanylǵan.
"Olar 3,3 mlrd teńge kólemindegi sýbsidiiany jymqyrdy degen kúdikke ilindi", – dedi Bijanov.
Eske salaiyq, biyl sáýir aiynda Qarjy monitoringi agenttigi Aýyl sharýashylyǵy ministrliginiń agroónerkásiptik keshendi tsifrlandyrý jáne memlekettik qyzmetterdi damytý departamentiniń burynǵy basshysy Baýyrjan Aiymbetovtiń ustalǵanyn habarlaǵan bolatyn.
Eks-sheneýnik biýdjet qarajatyn jymqyrý jáne zańsyz ainalymǵa shyǵarýmen ainalysqan shemaǵa qatysy bar degen kúdikke ilingen. Sol kezde keltirilgen zalal kólemi 1,5 mlrd teńge dep baǵalanǵan.
Tergeý materialdaryna sáikes, 2018–2022 jyldary Aiymbetov Jambyl jáne Túrkistan oblystarynda sýbsidiia alý kezinde alaiaqtyq shemalarǵa belsendi qatysqan.
Ol Beket Ábishevpen birge 29 sharýa qojalyǵynyń elektrondy tsifrlyq qoltańbalaryn paidalanyp, elitalyq tańqýrai kóshetterin jetkizý týraly jalǵan qujattar arqyly zańsyz sýbsidiia alǵany anyqtalǵan.
