Aýyl sharýashylyǵy ministrligi iri qara mal etin shyǵarýǵa qatysty jańa shekteýlerdi qoldaný tártibin túsindirdi, dep habarlaidy Dalanews.kz
Vedomstvonyń málimetinshe, 2025 jylǵy 31 jeltoqsannan bastap Qazaqstan aýmaǵynan úshinshi elderge jáne Eýraziialyq ekonomikalyq odaq (EAEO) memleketterine iri qara mal etin áketýge arnalǵan kvotalardy bólý qaǵidalary kúshine endi. Atalǵan norma 2026 jylǵy 30 maýsymǵa deiin qoldanylady.
IQM etin eksporttaýǵa arnalǵan kvotanyń jalpy kólemi 20 myń tonna deńgeiinde belgilengen. Kvota tek menshikti bordaqylaý alańyndaǵy mal basyn paidalanatyn et óńdeýshi kásiporyndarǵa bólinedi.
Bir zańdy tulǵaǵa beriletin kvota kólemi bordaqylaý alańynyń qýatyna bailanysty aiqyndalady. Atap aitqanda:
-
bordaqylaý alańynyń qýaty 5 myń bastan assa — 1 000 tonna;
-
10 myń bastan assa — 2 000 tonna;
-
15 myń bastan assa — 3 000 tonna;
-
20 myń bastan assa — 4 000 tonna;
-
50 myń bastan joǵary bolsa — 10 000 tonnaǵa deiin et eksporttaýǵa ruqsat beriledi.
Ministrlik bul sharalar tolyq óndiristik tsiklmen jumys isteitin kásiporyndardy qoldaýǵa jáne syrtqy saýda operatsiialarynyń ashyqtyǵyn arttyrýǵa baǵyttalǵanyn atap ótti. Sonymen qatar shekteýler ishki naryq múddesin qorǵaý men mal sharýashylyǵyn damytýdyń strategiialyq mindetterinen týyndap otyr.
Ýaqytsha shekteýlerdiń negizgi maqsaty – azyq-túlik qaýipsizdigin qamtamasyz etý, et ónimin tereń óńdeýdi yntalandyrý, statistikalyq derekterdiń aiqyndyǵyn arttyrý jáne ónimniń shyǵý tegin qadaǵalaý.
Ministrlik málimetinshe, buǵan deiin jekelegen kompaniialar men shaǵyn soiý tsehtary maldy bordaqylaýsyz qaita satyp, menshikti óndiristik infraqurylymdy damytpai jumys istegen. Mundai tájiribe alypsatarlyqqa jol ashyp, ishki naryqtaǵy suranys pen usynys teńgerimin burmalap, et baǵasynyń ósýine áser etken.
Sondyqtan kvotalaý tetigi mal ósirýmen jáne bordaqylaýmen ainalyspaityn eksporttyq deldaldardy naryqtan yǵystyrýǵa, al óndiristik bazaǵa investitsiia salyp, tehnologiia engizip, jumys oryndaryn quratyn naqty óndirýshilerdi qoldaýǵa baǵyttalǵan.
Syrtqy saýda qatysýshylaryna sandyq shekteýlerdi bólý, kvotanyń kólemi men qoldanylý merzimin belgileý ortalyq memlekettik organdar tarapynan ýákiletti organmen kelisý arqyly júzege asyrylady. Bul ishki naryqtaǵy jaǵdaiǵa jedel ári ikemdi áreket etýge múmkindik beredi.
Jalpy alǵanda, qabyldanǵan buiryq qazaqstandyq mal sharýashylyǵyn uzaq merzimdi damytýǵa, ishki naryqtyń turaqtylyǵyn qamtamasyz etýge jáne tutynýshylar úshin sapaly siyr etiniń qoljetimdiligin arttyrýǵa baǵyttalǵan.
