اۋىل شارۋاشىلىعى مينيسترلىگى ءىرى قارا مال ەتىن شىعارۋعا قاتىستى جاڭا شەكتەۋلەردى قولدانۋ ءتارتىبىن ءتۇسىندىردى، دەپ حابارلايدى Dalanews.kz 

ۆەدومستۆونىڭ مالىمەتىنشە، 2025 جىلعى 31 جەلتوقساننان باستاپ قازاقستان اۋماعىنان ءۇشىنشى ەلدەرگە جانە ەۋرازيالىق ەكونوميكالىق وداق (ەاەو) مەملەكەتتەرىنە ءىرى قارا مال ەتىن اكەتۋگە ارنالعان كۆوتالاردى ءبولۋ قاعيدالارى كۇشىنە ەندى. اتالعان نورما 2026 جىلعى 30 ماۋسىمعا دەيىن قولدانىلادى.

ءىقم ەتىن ەكسپورتتاۋعا ارنالعان كۆوتانىڭ جالپى كولەمى 20 مىڭ توننا دەڭگەيىندە بەلگىلەنگەن. كۆوتا تەك مەنشىكتى بورداقىلاۋ الاڭىنداعى مال باسىن پايدالاناتىن ەت وڭدەۋشى كاسىپورىندارعا بولىنەدى.

ءبىر زاڭدى تۇلعاعا بەرىلەتىن كۆوتا كولەمى بورداقىلاۋ الاڭىنىڭ قۋاتىنا بايلانىستى ايقىندالادى. اتاپ ايتقاندا:

• بورداقىلاۋ الاڭىنىڭ قۋاتى 5 مىڭ باستان اسسا — 1 000 توننا؛

• 10 مىڭ باستان اسسا — 2 000 توننا؛

• 15 مىڭ باستان اسسا — 3 000 توننا؛

• 20 مىڭ باستان اسسا — 4 000 توننا؛

• 50 مىڭ باستان جوعارى بولسا — 10 000 تونناعا دەيىن ەت ەكسپورتتاۋعا رۇقسات بەرىلەدى.

مينيسترلىك بۇل شارالار تولىق وندىرىستىك سيكلمەن جۇمىس ىستەيتىن كاسىپورىنداردى قولداۋعا جانە سىرتقى ساۋدا وپەراسيالارىنىڭ اشىقتىعىن ارتتىرۋعا باعىتتالعانىن اتاپ ءوتتى. سونىمەن قاتار شەكتەۋلەر ىشكى نارىق مۇددەسىن قورعاۋ مەن مال شارۋاشىلىعىن دامىتۋدىڭ ستراتەگيالىق مىندەتتەرىنەن تۋىنداپ وتىر.

ۋاقىتشا شەكتەۋلەردىڭ نەگىزگى ماقساتى – ازىق-تۇلىك قاۋىپسىزدىگىن قامتاماسىز ەتۋ، ەت ءونىمىن تەرەڭ وڭدەۋدى ىنتالاندىرۋ، ستاتيستيكالىق دەرەكتەردىڭ ايقىندىعىن ارتتىرۋ جانە ءونىمنىڭ شىعۋ تەگىن قاداعالاۋ.

مينيسترلىك مالىمەتىنشە، بۇعان دەيىن جەكەلەگەن كومپانيالار مەن شاعىن سويۋ سەحتارى مالدى بورداقىلاۋسىز قايتا ساتىپ، مەنشىكتى وندىرىستىك ينفراقۇرىلىمدى دامىتپاي جۇمىس ىستەگەن. مۇنداي تاجىريبە الىپساتارلىققا جول اشىپ، ىشكى نارىقتاعى سۇرانىس پەن ۇسىنىس تەڭگەرىمىن بۇرمالاپ، ەت باعاسىنىڭ وسۋىنە اسەر ەتكەن.

سوندىقتان كۆوتالاۋ تەتىگى مال وسىرۋمەن جانە بورداقىلاۋمەن اينالىسپايتىن ەكسپورتتىق دەلدالداردى نارىقتان ىعىستىرۋعا، ال وندىرىستىك بازاعا ينۆەستيسيا سالىپ، تەحنولوگيا ەنگىزىپ، جۇمىس ورىندارىن قۇراتىن ناقتى وندىرۋشىلەردى قولداۋعا باعىتتالعان.

سىرتقى ساۋدا قاتىسۋشىلارىنا ساندىق شەكتەۋلەردى ءبولۋ، كۆوتانىڭ كولەمى مەن قولدانىلۋ مەرزىمىن بەلگىلەۋ ورتالىق مەملەكەتتىك ورگاندار تاراپىنان ۋاكىلەتتى ورگانمەن كەلىسۋ ارقىلى جۇزەگە اسىرىلادى. بۇل ىشكى نارىقتاعى جاعدايعا جەدەل ءارى يكەمدى ارەكەت ەتۋگە مۇمكىندىك بەرەدى.

جالپى العاندا، قابىلدانعان بۇيرىق قازاقستاندىق مال شارۋاشىلىعىن ۇزاق مەرزىمدى دامىتۋعا، ىشكى نارىقتىڭ تۇراقتىلىعىن قامتاماسىز ەتۋگە جانە تۇتىنۋشىلار ءۇشىن ساپالى سيىر ەتىنىڭ قولجەتىمدىلىگىن ارتتىرۋعا باعىتتالعان.