«Aýyl» partiiasy men «Mansap» jekemenshik mektebi Qyzylorda qalasynda aýyl ustazdaryn qoldaý maqsatynda shara uiymdastyrdy. «Bilimdi urpaq aýyldan» dep atalǵan osy jiynǵa «Aýyl» partiiasynan Májilis depýtattyǵyna jáne túrli deńgeidegi jergilikti máslihattarǵa kandidattar qatysty. Jiynda jas pedagogtardy aýyl mektepterine jumysqa tartý, aýyl mektepteriniń aqparatqa qoljetimdiligin arttyrý máselesi talqylandy.
– Búgingi aýyl men qala arasynda birden kózge uratyn aitarlyqtai áleýmettik alshaqtyq bar. Qala muǵalimderinde bilimin damyta alatyn múmkindik mol.
Aýyl jáne qala jastaryna beriletin múmkindikter arasy da jer men kóktei. Jastar bolashaǵyn óz aýylymen bailanystyrý úshin aldymen turaqty jumys, laiyqty eńbekaqy, ómir súrýge qolaily infraqurylym, jol, sý, gaz problemasy sheshilý kerek. «Aýyl» partiiasynyń kózdegeni – aýylǵa erekshe nazar aýdarý. Aýyl men qala arasyndaǵy bilim berý, densaýlyq saqtaý, mádeniet, sport salalarynyń qyzmetteri sapasyndaǵy aiyrmashylyqty aitarlyqtai qysqartý.
«Diplommen – aýylǵa!», «Aýylǵa kel, jas maman!» baǵdarlamasyn qaita qaraý jáne oǵan zaman talabyna, jastar múddesine sai túzetýler men tolyqtyrýlar engizý. Aýyldarda jastarǵa arnalǵan sharalar ótkizetin, uiymdastyratyn ortalyqtar men mádeniet úilerin, sport sektsiialaryn ashýǵa bastamashy bolý, – dedi jiynǵa qatysýshylar aldynda sóz sóilegen atalǵan mektep quryltaishysy, «Aýyl» partiiasynan májilis depýtattyǵyna kandidat Sofiia Ábdirazaqova.
Kandidattar bilim salasy mamandarymen kezdesýden keiin at basyn oblystyń Syrdariia aýdanyndaǵy «Aqjarma jáne K» sharýa qojalyǵyna tiredi. Qyzylorda oblysyndaǵy iri aýyl sharýashylyǵy qurylymdarynyń biri, kúrish jáne mal sharýashylyǵymen ainalysatyn «Aqjarma jáne K» sharýa qojalyǵy eki júzge jýyq adamdy jumyspen qamtyp otyr. Et jáne sút ónimderiniń on segiz túrin shyǵarady.
Sharýashylyq bazasynda «Aqjarma agro» jáne «Aqjarma Invest» agroónerkásiptik kooperativteri qurylǵan. «Aqjarma Invest» oblystyq slette «et jáne sút baǵytyndaǵy Úzdik aýyl sharýashylyǵy kooperativi» atalymy boiynsha úzdik dep tanylǵan. Qojalyq jumysymen tanysyp, onyń jetistigine tánti bolǵan kandidattar sharýashylyqtyń mashina aýlasynda eńbek ujymymen kezdesý ótkizdi. Olarǵa «Aýyl» partiiasy sailaýaldy baǵdarlamasynyń negizgi baǵyttaryn túsindirip, úgit-nasihat jumystaryn júrgizdi.
– «Aýyl» partiiasynyń negizgi baǵyty – aýyl sharýashylyǵy salasynyń qaryshtap damýyn qamtamasyz etip, aýyldardyń órkendeýine úles qosý. Aýyl men aýyl sharýashylyǵy ajyramas uǵym. Olar adam arqaýy astyń atasy men anasy.
Aýyl – ár qazaq qasterleýi tiis alashtyń altyn qazyǵy. Muńy birdiń – múddesi bir. Aýyldyń múddesi – bizdiń múddemiz! Májiliske barǵanda biz birinshi kezekte memlekettik organdar tarapynan bolatyn, agrobiznes tiimdiliginiń tómendeýine jáne eksporttyń damýyna tikelei nemese janama qater tóndiretin kez kelgen shekteý nemese ózge de retteý sharalaryn qoldanýǵa tyiym salamyz.
Kommýnaldyq tarifterdi barlyq AÓK nysany, azyq-túlik taýarlaryn óndirýmen, saqtaýmen jáne kóterme satýmen ainalysatyn shaǵyn jáne orta biznes kásiporyndary úshin ózindik qun deńgeiine deiin sýbsidiialaýdy engizýge qol jetkizemiz. Otandyq biznesti import qysymynan qorǵaý maqsatynda jańa kedendik-tariftik saiasat ázirleý kúsh salamyz, – dedi «Aýyl» partiiasynan Májilis depýtattyǵyna kandidat Nurken Qarjaýbaev.
Kandidattardy sailaýshylar eki kezdesýde de jyly qabyldady. Partiianyń maqsat-múddesi óz murattarymen úndesetini aitqan jiynǵa qatysýshylar kandidattarǵa suraqtar qoiyp, usynystar berdi.
