– "Aýyl" Halyqtyq-demokratıalyq patrıottyq partıasy óz qatarynda tek aýyl sharýashylyǵy qyzmetkerlerin ǵana emes, jalpy aýylǵa janashyr azamattardyń kópshiligin biriktiredi. Bizdiń qatarymyzda agrarly sektor, bilim jáne medısına, áleýmettik sala qyzmetkerleri, ǵalymdar men zıaly qaýym ókilderi bar. Qazaqstandyqtardyń jartysyna jýyǵy aýylda turady.
Aýyldy, aýyldy aýmaqtardy damytý, aýyl sharýashylyǵyn órkendetý bizdiń memleketimizdiń azyq-túlik qaýipsizdiginiń negizi bolyp esepteledi. Bul - bizdiń partıanyń bastapqy jáne ózgermeıtin saıası baǵyty. Sondyqtan "Aýyl" halyqtyq-demokratıalyq patrıottyq partıasy parlamenttiń tómengi palatasy men máslıhattarǵa saılaý ótkizýdi quptaıdy.
Biz Qazaqstanda partıalyq óristiń keńeıgeni men saıası kúshter arasyndaǵy básekelestiktiń damyp kele jatqandyǵyn kórip otyrmyz. Bul bizdi qorqytpaıdy, kerisinshe, yntalandyrady. Sebebi bizdiń ózimizdiń saıası platformamyz bar. «Aýyl» partıasynyń aýyl jáne aýyldy aýmaqtardy damytý konsepsıasyna qosatyn óziniń usynystary bar.
Sondyqtan biz jańa saılaý sıklinde adal jáne ashyq kúreske daıynbyz, – dedi partıa tóraǵasy Álı Bektaev.
Al «Baıtaq» partıasynyń jetekshisi Azamathan Ámirtaı Feısbýk paraqshasynda ózi basqaratyn saıası uıymnyń saılaýǵa qatysýǵa daıyn ekenin málim etti.
– Kezekten tys Májilis hám máslıhat saılaýy aldaǵy naýryzdyń 19 juldyzyna belgilendi. Durys. Bulda bir Jańa Qazaqstan qurý jolyndaǵy saıası reformanyń bir joly. Jańa Qazaqstanǵa jańa depýtattarmen, jańa partıalardyń saıasatqa aralasýy kerek.
Aldaǵy saılaý burynǵylardan ózgeshe bolady. Saılaý aralas partıalyq-majorıtarlyq júıe boıynsha ótpek.
Osy oraıda «Baıtaq» partıasy da básekede baǵyn synap, Parlamentke ótýge kúsh salamyz. Ras, elimizde ekologıa máselesi aqsap tur. Jaǵdaı syn kótermeıdi. Sondyqtan túıini mol ekologıa máselelerin parlament minberinnen kótermekshimiz, – dedi partıa jetekshisi.
