QR Ulttyq ekonomika ministrligi aýyldyq eldimekenderge jumys isteý úshin kóship kelgenderge jeńildikpen beriletin ipotekalyq nesie mólsherlemesin qaita qarady. 2025 jylǵy 18 tamyzdan bastap ómirdi aýyldyq jerlermen bailanystyrýǵa sheshim qabyldaǵan mamandar úshin turǵyn úi kreditterin berýdiń jańa erejeleri kúshine enedi, dep habarlaidy Dalanews.kz.
Ulttyq ekonomika ministrligi aýyldyq aimaqtaǵy jumysshylardy áleýmettik turǵyda qoldaýdy qarastyratyn qujatqa túzetýler men ózgerister engizdi. Buiryqqa vedomstvo basshysy Serik Jumanǵarin qol qoidy.
Jeńildikter densaýlyq saqtaý, bilim berý, áleýmettik qorǵaý, mádeniet, sport, agroónerkásip salasyndaǵy mamandarǵa, sondai-aq aýyl ákimdikteri apparattarynyń memlekettik qyzmetshilerine arnalǵan. Olar mundai jeńildikke ie bolýy úshin jumys babymen aýylǵa, shaǵyn qalaǵa nemese aýyldyq okrýgterge kóship barýy kerek.
Qujattaǵy basty ózgerister mynalar:
- ipotekalyq nesieleý merzimi - 15 jylǵa deiin, biraq jyldyq syiaqy mólsherlemesi endi burynǵy simvoldyq mólsherde 0,01% emes, 1% bolady;
- nesie alýshynyń, onyń jubaiynyń jáne balalarynyń ózderi kóshetin aýdanda baspanasy bolmaýy tiis.
Jańa ózgeris baǵdarlamanyń sharttaryn bankter úshin neǵurlym turaqty etýge, sonymen qatar mamandar úshin qoljetimdi ipotekany sol kúiinde saqtaýǵa baǵyttalǵany naqtylanady.
