Áleýmettik jelilerde taraǵan jemqorlyq sipatyndaǵy málimetterden keiin Bas kólik prokýratýrasy Air Astana jáne onyń qurylymy Fly Arystan áýekompaniialarynyń qyzmetine tekseris bastaýdy qolǵa aldy, dep habarlaidy Dalanews.kz.
Prokýratýranyń málimetinshe, jariialanǵan materialdarda jeńildetilgen aviabiletterdi kompaniia basshylyǵynyń nusqaýymen top-menedjmenttiń týystaryna jáne ózge de «arnaiy adamdarǵa» berý derekteri aitylǵan. Osyǵan bailanysty Azamattyq aviatsiia komitetine eki áýekompaniianyń qyzmetin tekserý týraly talap joldanǵan.
Janjal Fly Arystan-nyń burynǵy top-menedjeri Renat Abýlhanovtyń atynan jariialanǵan jazbalardan keiin órshidi. Onda «blat» júiesi arqyly Air Astana basshylyǵynyń ókilderi men olardyń jaqyndaryna eń tómengi tarifpen biletter rásimdelgeni aitylǵan. Atap aitqanda, aviakompaniia prezidenti Piter Fosterdiń jubaiy Tatiana Fosterge, onyń ápkesi men anasyna jeńildetilgen biletter berilgeni kórsetiledi.
Materialdarda WhatsApp hat almasýlary da keltirilgen. Onda qyzmetkerler «qajetti adamdarǵa» eń arzan tarifpen oryn ashýdy suraidy. Habarlamalarda kimge «bolady», kimge «bolmaidy» degen talqylaýlar bar. Bul tájiribeniń bir qyzmetkerdiń bastamasy emes, júieli ishki mehanizm bolǵanyn meńzeidi.
Abýlhanovtyń aitýynsha, ol Air Astana-nyń IPO-ǵa daiyndyq kezeńinde kompaniia basshylyǵyna "yńǵaisyz" adamǵa ainalǵan. Onyń sózinshe, odan tabysty ádeii asyra kórsetýdi talap etken, alaida ol investorlardy adastyrmaý úshin buǵan kelispegen. Osydan keiin ol esh túsindirmesiz jumystan shettetilgen.
Sonymen qatar, Ernst & Young esebinde bilettermen kúmándi operatsiialar jasaǵan ondaǵan akkaýnt kórsetilgenimen, qylmystyq jaýapkershilikke is júzinde tek Abýlhanov tartylǵany aitylyp otyr. Al Air Astana aiyptalýshynyń ǵana emes, onyń jubaiy men anasynyń da múlkin tárkileýdi talap etip otyr.
Osy jaǵdai aiasynda redaktsiia tiisti organdarǵa suraý joldaǵan. Ázirge resmi pikirdi tek Bas kólik prokýratýrasy bildirdi. Air Astana ókilderi tergeý júrip jatqanyn aityp, túsinikteme berýden bas tartty.
