Atyraý oblysynda bir otbasynyń qazasyna qatysty atyshýly is boiynsha tyń málimet shyqty. Tergeý barysynda qaza tapqan jandardyń qyzy ári kúdikti Sultan Sársemálievtiń jubaiy Aqbaian Muqanǵalievanyń kisi ólimine qatysy bary anyqtalmaǵan, dep habarlaidy Dalanews.kz Kazinform-ǵa silteme jasap.
Atyraý oblysy prokýrorynyń kómekshisi Jandar Bolatbektiń aitýynsha, Aqbaian Muqanǵalievaǵa qatysty adam óltirý faktisi boiynsha qylmystyq quqyqbuzýshylyq belgileri tabylmaǵan.
“Onyń adam óltirý deregine qatysy bolmaǵandyqtan, bul bap boiynsha qylmystyq qýdalaý toqtatyldy. Alaida qylmys týraly habarlamaý faktisi boiynsha bólek is tirkeldi. Qazirgi tańda oǵan quqyqtyq baǵa berilgen joq. Aqbaian Muqanǵalieva is boiynsha kúdikti retinde tanylmaidy jáne oǵan qatysty bultartpaý sharasy qoldanylǵan joq”, – dedi ol.
Prokýratýra málimetinshe, áieldiń psihikalyq jaǵdaiyna bailanysty Almaty qalasynda psihiatriialyq saraptama júrgizilgen. Alaida onyń qorytyndysy ázirge tergeý organdaryna kelip túspegen.
“Saraptama qorytyndysy daiyn degen aqparat bar. Biraq bizge áli resmi túrde joldanǵan joq. Qorytyndy kelgen soń zerdelenedi. Qajet bolǵan jaǵdaida qosymsha saraptama taǵaiyndalýy múmkin”, – dedi Jandar Bolatbek.
Sondai-aq Aqbaian Muqanǵalievanyń Almatydan Atyraýǵa qaitarylyp, qazir oblystyq psihikalyq densaýlyq ortalyǵynda jatqandyǵy belgili boldy.
Al tórt adamnyń ólimine kúdikti dep tanylǵan Sultan Sársemálievke qatysty sot protsesi 18 mamyr kúni saǵat 11:00-de ótedi. Is ashyq formatta qaralady.
Eske salaiyq, buǵan deiin Sultan Sársemálievke qatysty sotqa deiingi tergeý aiaqtalǵan edi. Oǵan Qylmystyq kodekstiń 99-baby 2-bóligi 1-tarmaǵy boiynsha (“eki nemese odan da kóp adamdy óltirý”), sondai-aq mal satý men bank kartalaryn jymqyrý faktileri boiynsha 188 jáne 190-baptarymen aiyp taǵylǵan.
Aita keteiik, Atyraý oblysy Jańgeldin aýylynda turatyn otbasy 2025 jyldyń sońynda belgisiz jaǵdaida joǵalyp ketken. 2026 jylǵy 6 qańtarda sharýashylyq qorasynan otbasy iesi Maqsot Qarabalin men onyń jubaiy Násip Óteshqalievanyń máiitteri tabylǵan. Keiin olardyń denesinde pyshaq jaraqaty bolǵany anyqtaldy.
Tergeý derekterine sáikes, Naýryz Muqanǵaliev 2025 jyldyń mamyr aiynda kóz jumǵan. Al otbasynyń taǵy úsh múshesi – otaǵasy, jubaiy jáne qyzy qarasha aiynda qaitys bolǵan.
9 qańtarda marqumdardyń kúieý balasy Sultan Sársemálievke izdeý jariialanǵany belgili boldy. Sol kezde qaza tapqandardyń qyzy Aqbaian Muqanǵalievaǵa da kúdikti mártebesi berilgen edi.
Keiinirek, 24 aqpanda Sársemáliev pen Muqanǵalievanyń Indoneziiadaǵy Lombok aralyndaǵy Senarý aýylynda ustalǵany habarlandy. Naýryz aiynda olar Atyraýǵa jetkizildi.
Odan soń politsiia qyzmetkerleri Sultan Sársemálievti qylmys bolǵan úige aparyp, tergeý eksperimentin júrgizgen. Kúdikti sol jerde qylmysty qalai jasaǵanyn kórsetip, tergeýshilerdiń suraqtaryna jaýap bergen.
