Atyraýda qubyr aýystyrý jobasy kezinde kvazimemlekettik sektordyń qarajatyn asa iri kólemde jymqyrdy dep aiyptalǵan bes adamǵa sot úkimi shyqty, dep habarlaidy dalanews.kz.
Atyraý qalasynyń №2 sotynyń málimetinshe, sottalýshylarǵa adamdar tobynyń aldyn ala sóz bailasýymen, qyzmettik jaǵdaiyn paidalanyp, asa iri kólemde alaiaqtyq jasaǵany úshin aiyp taǵylǵan.
Sot anyqtaǵandai, aiyptalýshy S. qubyrdy aýystyrý tenderin jeńip alǵan merdiger uiymdy beiresmi túrde basqaryp, qylmysty uiymdastyrǵan. Ol tapsyrys berýshi uiym basshysynyń orynbasary K., merdiger uiym qyzmetkerleri I. men M., sondai-aq avtorlyq qadaǵalaýshy A.-men aldyn ala sóz bailasyp, bekitilgen jobany zańsyz ózgertý arqyly kvazimemlekettik sektordyń qarajatyn jymqyrǵan.
Sot barysynda aiyptalýshylar kinálaryn moiyndamai, ózderin aqtaýdy suraǵan.
Olardyń kinási kýágerlerdiń jaýaptarymen, jasyryn tergeý áreketteriniń materialdarymen, hat-habarlarmen, sondai-aq mamandar men sarapshylardyń qorytyndylarymen dáleldengen.
Sot úkimimen S. 6 jyl 8 aiǵa bas bostandyǵynan aiyryldy. K., I. jáne M. árqaisysy 6 jylǵa sottaldy. Al A. 5 jylǵa bas bostandyǵynan aiyryldy.
Sondai-aq jábirlenýshi taraptyń azamattyq talaby ishinara qanaǵattandyryldy.
Úkim zańdy kúshine engen joq.
