Atyraý oblysynyń Tasqala kentinde esirtki jasyryp júrgen degen kúdikpen eki qyzdyń ustalǵany týraly video áleýmettik jelide tarady, dep habarlaidy dalanews.kz.
Jelide jariialanǵan málimetke sáikes, oqiǵa 25 tamyz kúni saǵat 16:25 shamasynda bolǵan. Videodaǵy eki qyzdyń esirtki zattaryn jasyryn oryndarǵa qaldyryp júrgen jerinen ustalǵany aitylady.
Azattyq Rýhy redaktsiiasy oqiǵaǵa qatysty Atyraý oblysynyń politsiia departamentine resmi saýal joldady. Vedomstvo atalǵan faktini rastaǵanymen, tergeý múddesine bailanysty egjei-tegjeili aqparat usynbady.
"Atalǵan fakt boiynsha tergeý amaldary júrgizilip jatyr. Qazirgi ýaqytta oqiǵanyń barlyq mán-jaiy jan-jaqty tekserilýde. Tekserý qorytyndysy boiynsha tiisti sheshim qabyldanady", - dep habarlady politsiia departamenti.
Áleýmettik jeli qoldanýshylary videodaǵy qyzdardyń kámeletke tolmaǵan bolýy múmkin ekenin jazyp, olardy zańsyz áreketke tartqan adamdardy da anyqtap, jaýapqa tartýdy talap etti. Qyzdardyń jasy men oqiǵaǵa qatysy týraly resmi aqparat ázirge jariialanǵan joq.
