Atyraýda 12 jastaǵy mektep oqýshysyna tiisip, ony qorqytqan er adamǵa qatysty qylmystyq is qozǵaldy, dep habarlaidy dalanews.kz KTK telearnasyna silteme jasap.
Qyzdyń anasy Balaýsa Óteýovanyń aitýynsha, oqiǵa jeksenbi kúni keshki saǵat 22:00 shamasynda bolǵan. Oiyn alańynan úiine qaityp kele jatqan oqýshyǵa beitanys er adam jaqyndap, agressivti áreket kórsetken.
Anasynyń sózinshe, er adam qyzdan ózine alkogol satyp ákelýdi talap etip, keiin ony erninen súiýge májbúrlemek bolǵan.
– Ol qyzymdy qorqytyp, aiqailaǵan. Dúkenge birge barýdy talap etken. Qyzym kómek suraýǵa múmkindik týady dep úmittenip kelisken. Keiin er adam ony erninen súiýdi talap etip, ózine qarai tartqan. Sol sátte qyzym onyń shashynan ustap, bosap shyǵyp qashyp ketken, – dedi Balaýsa Óteýova.
Týystarynyń aitýynsha, eger qyz qashyp qutyla almaǵan jaǵdaida, oqiǵa odan da aýyr saldarǵa ulasýy múmkin edi. Qazir oqýshy úiden jalǵyz shyǵýǵa qorqady.
Atyraý oblystyq politsiia departamenti atalǵan derek boiynsha qylmystyq is qozǵalǵanyn málimdedi.
– Oqiǵa boiynsha qylmystyq is tirkeldi. Qazirgi ýaqytta kúdiktiniń jeke basyn anyqtaý jáne ony ustaý baǵytynda jedel-izdestirý sharalary júrgizilip jatyr, – dep habarlady politsiia.
Oqiǵaǵa qatysty tergeý jalǵasýda.
